Read Bhaibhiri Idzva rechiShona Nziyo 45 Bible Online

Nziyo 45 - Bhaibhiri Idzva rechiShona bible

Nziyo 45

¹Rwiyo rwomuchato wamambo Mwoyo wangu unotutuma namashoko akanaka ndinodetemba nhetembo yangu kuna Mambo rurimi rwangu rwakaita sepenzura yenyanzvi yomunyori.

²Imi makanaka chimiro kupinda vanhu vose mune rurimi runotaura zvinonwisa mvura; saizvozvo Mwari akakukomborerai narini narini.

³Imi gamba pakatirai bakatwa renyu rinokupai mbiri nechiremera chenyu,

⁴mufambe nechiremera nokukunda kwenyu muchimiririra chokwadi noruenzaniso ruoko rwenyu rworudyi ruratidze zviito zvinotyisa.

⁵Miseve yenyu yakapinza inobaya mwoyo yavavengi venyu, mambo. Vanhu vanowira pasi penyu

⁶chigaro chenyu choushe chakagadzwa naMwari chinogara nokusingaperi. Tsvimbo yenyu youshe itsvimbo yokutendeka.

⁷Munoda ururami muchivenga uipi, naizvozvo Mwari, Mwari wenyu akakuzodzai namafuta anoratidza kufara kuti muve pamusoro pavamwe venyu.

⁸Magemenzi enyu anonhuwirira mura nearosi nekasia. Mumuzinda wenyu wakashongedzwa nenyanga dzenzou, madimbwa anokufadzai.

⁹Vanasikana vamambo varipo pakati pavakadzi vomumuzinda, kurudzi kwenyu kwakamira mambokadzi anezvishongo zvendarama yokuOfiri.

¹⁰Chinzwa mwanasikana, nyatsopafungisisa uteerere: vanhu vokwako neveimba yokwababa vako kanganwa.

¹¹Mambo achafadzwa norunako rwako. Zvaari tenzi wako mukotamire.[24]

¹²Vanhu vokuTire vachakuunzira zvipo, ivo vapfumi chaivo

¹³vachakuunzirai upfumi hworudzi norudzi. Mukunda anoshongedzwa muimba make namagemenzi akarukwa nendarama.

¹⁴Anozotungamidzwa kuna mambo akapfeka magemenzi ana mavara mavara aine mhandara dzake dzokumuperekedza mudungwerungwe rake.

¹⁵Vanotungamirirwa nomufaro vachipururudza vachipinda mumuzinda wamambo.

¹⁶Vokutsiva madzibaba enyu, mambo muchava navana muchavaita madzishe apanyika pose.

¹⁷Ndichaita kuti zita renyu rirangarirwe pazvizvarwa zvose naizvozvo marudzi avanhu achakurumbidzai narini narini.