Read Bhaibhiri Idzva rechiShona Nziyo 48 Bible Online

Nziyo 48 - Bhaibhiri Idzva rechiShona bible

Nziyo 48

¹Zioni guta raMwari TENZI mukuru anofanira kurumbidzwa zvikuru muguta raMwari wedu, mugomo rake rinoera.

²Kuti dzu-u kwaro kunoyevedza, rinopa rufaro pasi pose. Iro gomo reZioni riri kuchamhembe iguta ramambo mukuru.

³Mukati nhare dzaro dzokuzvidzivirira muhondo, Mwari akaratidza kuti ndiye mudziviriri wechokwadi

⁴nokuti tarisai muone madzimambo akakokorodzana, vakauya kuzoita chirwirangwe.

⁵Pavakazviona izvi, vakadumbirwa kwazvo zvakavatyisa ndokubva vati ware kutiza.

⁶Vakadedera ipapo vakarwadziwa somudzimai ari pahata.

⁷Makaparadza ngarava dzokuTarishishi nedutu rokumabvazuva.

⁸Zvatakanzwa ndizvo zvatakaonawo muguta raTENZI wehondo nehondo, muguta raMwari wedu Mwari acharisimbisa nokusingaperi. Dzepfunde

⁹Mukati meTemberi yenyu, Mwari, tinorangarira nezvomwoyochena wenyu.

¹⁰Sezvakangoita zita renyu Mwari, ndizvozvo zvakaita mbiri yenyu inosvika kwakaperera nyika. Ruoko rwenyu rworudyi rwuzere nokururama[26] ngarifare.

¹¹Guta rapagomo reZioni[27] ngarifare. Tumaguta[28] twokwaJudha ngatufare pamusana pokutonga kwenyu.

¹²Famba fambai neguta reZioni, tendererai naro muverenge nharire dzaro.

¹³Nyatsoongororai tsvingo dzaro munyatsotarisa nharo dzaro dzokuzvidzivirira nadzo muhondo kuti mozoudza chizvarwa chinotevera

¹⁴nokuti Mwari uyu ndiye Mwari wedu narini narini; ndiye achatitungamirira narini narini.