Read Bhaibhiri Idzva rechiShona Nziyo 49 Bible Online

Nziyo 49 - Bhaibhiri Idzva rechiShona bible

Nziyo 49

¹Muimbisi, urwu rwiyo rwevekwaKora Inzwai imi mose marudzi avanhu teererai imi vagari vapanyika.

²Imi voruzhinji nemi vakuru vakuru imi vapfumi navarombo pamwechete.

³Muromo wangu uchataura ungwaru zvandinorangarira mumwoyo mangu zvinonzwisisika.

⁴Ndicharerekera nzeve yangu kutsumo. Ndicharapanura chirahwe changu mukuimba kwangu nechipendani.

⁵Ndingatyirei zvangu pamazuva akaipa kana uipi hwavavengi vangu hwandikomberedza.

⁶Vanhu vanovimba noupfumi hwavo vachazvikudza nokuwanda kwopfuma yavo?

⁷Asi hapana munhu angambogona kuzvidzikinura kana kuripa Mwari mutengo woupenyu hwake.

⁸Nokuti muripo woupenyu hwomunhu mukuru haumbofa wakakwana

⁹kuti arambe ari mupenyu nokusingaperi asina kuwana kuora.

¹⁰Achatozviona kuti kunyange vangwaru vanofa. Benzi nedununu vanoparara zvimwechetezvo vachiisiira upfumi hwavo kuna vamwe.

¹¹Makuva avo ndiwo achava misha yavo nokusingaperi. Ndiyo nzvimbo yavo yokugara pazvizvarwa zvose. Kunyange vakatumidza nyika namazita avo.

¹²Munhu haagoni kuramba ane mukurumbira wake; akangoitawo semhuka dzinoparara.

¹³Iwoyu ndiwo mugumo wavanhu vanozvitora; mugumo wavanhu vanofarisa nezvavanazvo. Dzepfunde

¹⁴Sehwai, vanotemerwa kuenda kunzvimbo yavakafa. Rufu ruchava mufudzi wavo vakarurama vachavatonga mangwanani chaiwo uye muviri wavo uchadyika. Nzvimbo yavakafa ndiyo ichava musha kwavari.

¹⁵Asi Mwari achandinunura upenyu kusimba renzvimbo yavakafa nokuti achandigamuchira. Dzepfunde

¹⁶Usakatyamare zvako kana munhu akava mupfumi kunyange mbiri yemba yake ikadhuma

¹⁷nokuti paanofa hapana chaanoenda nacho. Mbiri yake haidziki naye ichimutevera

¹⁸nokuti kunyange zvazvo paaiva mupenyu aizviti akakomborerwa uye kunyange akarumbidzwa zvake paanenge abudirira.

¹⁹Achatoenda kuchizvarwa chamadzitateguru ake vasingazombofa vakaona chiedza.

²⁰Munhu haagoni kuramba aine mukurumbira wake akangoitawo somhuka dzinoparara.