Read Bhaibhiri Idzva rechiShona Nziyo 50 Bible Online

Nziyo 50 - Bhaibhiri Idzva rechiShona bible

Nziyo 50

¹Kunamata kwepachokwadi Iye Samasimbaose TENZI Mwari anotaura, anodaidzira pasi pose kubvira kumabvazuva kusvikira kumadokero.

²Mwari anopenya ari mugomo reZioni, gomo rakanakisisa kwazvo.

³Mwari wedu anouya haanyarari. Pamberi pake pane moto unoririmisa akatenderedzwa nedutu remhepo.

⁴Anokoka matenga kusoro nenyika kuti atonge vanhu vake.

⁵“Ndiunganidzirei vakazvipira kwandiri vakaita chitenderano nechibayiro neni.”

⁶Matenga anotaura nezvoururami hwake nokuti iye Mwari ndiye mutongi. Dzepfunde

⁷“Teererai munzwe imi vanhu vangu ini ndichataura imi vaIsiraeri ndichakupai mhosva ndini Mwari, Mwari wenyu.

⁸Handikutsiurirei zvibayiro zvenyu, mipiro yenyu yokupisa inogara iri pamberi pangu.

⁹Handichagamuchiri handira kubva kumba yenyu kana chikotora mudanga renyu

¹⁰nokuti mhuka yose zvayo yesango ndeyangu kana idzo mombe mumakomo akazanirana.

¹¹Shiri dzose dzomumakomo ndinodziziva uye zvose zvinofamba musango ndezvangu.

¹²Dai kuri kuti ndaita nzara, handaiudza iwe nokuti pasi pose nazvose zviripo ndezvangu.

¹³Ko ini ndinodya nyama yehandira here kana kunwa ropa rembudzi here?

¹⁴Kutenda[29] kwako ngakuve chibayiro chako uite zvawakatsidza kuita kunoWokumusorosoro.

¹⁵Pakadaro daidzira kwandiri pazuva renhamo ndichakununura ukatozondirumbidza.”

¹⁶Kune wakaipa Mwari anoti, “Unodetemberei mitemo yangu, kana kutaura pamuromo pako chitenderano changu?

¹⁷Zvokudzorwa haudi uye unofuratira mazwi angu.

¹⁸Ukaona mbavha unobva waita ushamwari nayo uye unoita usahwira nemhombwe.

¹⁹Unotopa muromo wako manyemwe okutaura zvakaipa. Rurimi rwako runoronga unyengedzi

²⁰Unogara pasi uchitaura zvakaipa nezvemukoma kana munun'una wako uchinyeya mwana wamai vako chaiye.

²¹Wakaita izvi, asi inindikanyarara zvangu, wakafungaka iwe kuti ndakafanana newe; zvino ndinokutsiura ndichikupa mhosva.

²²Nzwisisai izvi, imi munokanganwa Mwari ndingadaro ndikabvarura munhu pagoshaya anonunura.

²³Chibayiro chokutenda[30] chinondiremekedza uye munhu anogadziridza upenyu hwake ndichamuratidza ruponeso rwaMwari.”