Read Bhaibhiri Idzva rechiShona Nziyo 51 Bible Online

Nziyo 51 - Bhaibhiri Idzva rechiShona bible

Nziyo 51

¹Munamato wokupfidza Ndinzwireiwo tsitsi Mwari pamusana pemwoyochena wenyu nokuda kwengoni dzenyu zhinji. Pfudzai kukanganisa kwangu.

²Ndishambidzei kwazvo kuuipi hwangu mundinatsewo kuchitadzo changu

³nokuti kukanganisa kwangu ndinokuziva uye chitadzo changu chinogara chiri pamwoyo pangu.

⁴Imi, imi chete ndimi vandakatadzira, kwamuri ndakaita zvakaipa zvokuti zvamakatema zvakarurama uye kutonga kwenyu hakuna chinoshoreka.

⁵Onai kuti ndakaberekwa muuipi mai vangu vakabata pamuviri pangu ndiri muchitadzo.

⁶Inga wani munoda chokwadi mukatikati momunhu; naizvozvo ndidzidziseiwo ungwaru mukatikati mangu makavandika.

⁷Ndinatsei nakapazi[31] komuhisopu ini ndichabva ndachena ndishambidzei ndibva ndachena kupinda mazaya echando.

⁸Regai ndinzwe kufara, ndipembere nokufara. Ndifaranutsei pakundityora mapfupa kwamakaita.

⁹Dai marega tarisa zvitadzo zvangu mupfudze zvenyu uipi hwangu hose.

¹⁰Ndipei mwoyo wakachena Mwari wangu muise mandiri mweya kwawo mutsva.

¹¹Musandidzinge pamuri uye musabvise Mweya wenyu mutsvene mandiri.

¹²Ndidzorerewo rufaro rworuponeso rwenyu mundichengetedze ndiine mwoyo wokuteerera.

¹³Ndingatozodzidziswa nzira dzenyu vanhu vanokanganisa, vatadzi vachitozodzokerawo kwamuri.

¹⁴Ndinunureiwo Mwari kumhosva yokuparadza ropa, imi Mwari mununuri wangu rurimi rwangu ruchapururudzira kununura kwenyu.

¹⁵TENZI zarurai miromo yangu muromo wangu uparidze mbiri yenyu.

¹⁶Nokuti hachisi chibayiro chamunofarira imi, kunyange zvazvo ndaipira mupiro wokupisa hamaimbofadzwa nawo,

¹⁷chibayiro changu kunemi Mwari, mwoyo wakatyoka-tyoka mwoyo wakatyoka uye wakatendeuka hamushore, Mwari.

¹⁸Itirai Zioni zvakanaka sokuda kwenyu; vakai zvakare masvingo eJerusaremu.

¹⁹Ipapo muchafadzwa nezvibayiro zvakarurama zvibayiro zvokupisa uye zvibayiro zvokupisa mutumbi wose. Ipapo handira dzichapirwa paatari yenyu.