Read Bhaibhiri Idzva rechiShona Nziyo 55 Bible Online

Nziyo 55 - Bhaibhiri Idzva rechiShona bible

Nziyo 55

¹Munamato womunhu apandukirwa neshamwari Inzwaiwo munamato wangu, Mwari; musavande chikumbiro changu.

²Nditeererei mundipindurewo, nhamo yangu yandiomera.

³Ndadumbirwa ini noruzha rwavavengi pamusana poudzvinyiriri hwavakaipa vanondiunzira nhamo. Vanoita daka neni zvine hasha.

⁴Ndinoshunguridzika mwoyo mukati mangu, ndawirwa nokutya rufu.

⁵Kutya nokudedera zvauya pandiri. Ndabatwa nokutya kwakanyanya.

⁶Nezvo ndinoti dai zvangu ndiina mapapiro senjiva, ndaibhururuka ndikandozorora.

⁷Ndaibhururukira kure ndichindogara kurenje. Dzepfunde

⁸Ndaikurumidza kundozvitsvagira pokuvanda mhepo inovhuvhuta nesimba nedutu guru.

⁹TENZI paradzanisai mupesanise ndimi dzavo nokuti ndinoona utsinye nokurwisana muguta.

¹⁰Siku nesikati vanoritenderera napamusoro pemasvingo aro. Unhunzvatunzva nokunetsa zvirimo.

¹¹Mune kuparadza mukati maro; uye udzvinyiriri nounyengedzi hazvibvi pamusika pavo.

¹²Dai kuri kuti muvengi anondisokosa, ndaitirira zvangu. Dai kuri kuti imhandu inondisora, ndaikwanisa kuivanda.

¹³Asi kuti ndiwe wezera neni, mumwe wangu shamwari yangu chaiyo.

¹⁴Taimbokurukurirana zvakanaka kwazvo. Tichifamba tose noushamwari mumba yaMwari.

¹⁵Ngavaerekane vaparara vaende kunzvimbo yavakafa vari vapenyu kudaro nokuti uipi huri mavanogara, huri pakati pavo.

¹⁶Asi ini ndinochema kuna Mwari, TENZI achandinunura.

¹⁷Manheru namangwanani uye masikati, ndinoisa chichemo changu ndichidemba; iye achanzwa izwi rangu.

¹⁸Achandinunura norugare pahondo yandiri kurwisa nokuti vanondirwisa[32] vakawanda.

¹⁹Mwari achanzwa zvake agovaninipisa, iye ari pachigaro choushe kubvira pasi chigare nokuti havasanduki uye havatyi Mwari. Dzepfunde

²⁰Mumwe wangu akarwisana neshamwari dzake; akatyora chitenderano chake, kutaura kwake kwakanga kwakapfavirira kupinda dovi asi mumwoyo make iri hondo chaiyo.

²¹Mazwi ake akanga akapfava kupinda mafuta asi ari mapakatwa akazvomorwa.

²²Turira mutoro wako kuna TENZI iye achaita kuti urambe wakagwinya. Haambobvumira kuti vakarurama vazunguzwe.

²³Asi imi Mwari dzikandei mugomba rapasi pasi mhondi idzodzi, vanhu voujarijari vasati vambosvika pakati napakati poupenyu hwavo. Asi ini ndichavimba nemi.