Read Bhaibhiri Idzva rechiShona Nziyo 59 Bible Online

Nziyo 59 - Bhaibhiri Idzva rechiShona bible

Nziyo 59

¹Kukumbira kuchengetedzwa Ndinunureiwo Mwari kuvavengi vangu. Ndidzivirireiwo kune vari kundimukira.

²Ndinunureiwo kuvaiti vezvakaipa, ndiponeseiwo kuvanhu vanofarira kudeura ropa.

³Nokuti tarisai muone vanondihwandira vachida kundiuraya. Varume vanotyisa vanoita chirwirangwe kundirwisa pasina kukanganisa kana kutadza kwandaita, TENZI.

⁴Pasina mhosva yandaita vanomhanya kundogadzirira. Simukai muuye kuzondibatsira, muone zvenyu.

⁵Imi TENZI Mwari wehondo nehondo ndimi Mwari weIsiraeri. Simukai murange marudzi ose; musararamise kana mumwechete waavo vanoita bangano rakaipa. Dzepfunde.

⁶Manheru oga oga vanodzoka vachihuhudza sembwa vachipota naro guta.

⁷Ipapo vachihon'a nemiromo yavo vaina mazwi anobaya mwoyo pamiromo yavo nokuti vanoti, “Ndiani angatinzwe.”

⁸Asi imi TENZI munovaseka zvenyu munoshora vechirudzi vose.

⁹Imi, simba rangu, ndinotarisa kwamuri nokuti imi Mwari ndimi nhare yandinozvidzivirira nayo muhondo.

¹⁰Mwari, nemwoyochena wake, achandichingura. Mwari wangu achaita kuti nditarise vavengi vangu vakundwa.

¹¹Regai kubva mavauraya vanhu vokwangu vangakanganwe; vadzungaidzei nesimba renyu mozovawisira pasi, TENZI, nhowo yedu.

¹²Pamusana pechitadzo chemiromo yavo chavakataura nemiromo yavo, ngavakachikirwe nokuzvikudza kwavo nokuda kwokurengerera kwavo vamwe rushambwa nokureva nhema kwavanoita,

¹³vaparadzei nehasha; vaparadzei zvokusazovapozve kuti vanhu vazive kuti Mwari ndiye anotonga vokwaJakobho kusvikira kwakagumira nyika. Dzepfunde.

¹⁴Manheru oga oga vanodzoka vohuhudza sembwa vachipota naro guta

¹⁵vanodzengerera vachitsvaka chokudya vachihon'a kana vasina kuguta.

¹⁶Asi ini ndinoimba ndichirumbidza simba renyu. Ndichaimba ndichidaidzira ndichirumbidza mwoyochena wenyu mangwanani nokuti imi ndimi manga muri nhare yandinozvidzivirira nayo muhondo uye diziro rangu panguva yenhamo.

¹⁷Imi simba rangu ndichaimba ndichikurumbidzai nokuti imi Mwari ndimi nhare yandinozvidzivirira navo muhondo. Mwari anondiitira mwoyochena.