Read Bhaibhiri Idzva rechiShona Nziyo 66 Bible Online

Nziyo 66 - Bhaibhiri Idzva rechiShona bible

Nziyo 66

¹Rwiyo rwokurumbidza nokutenda Pururudzirai Mwari imi nyika yose.

²Imbirai mbiri yezita rake, murumbidzei zvikuru kwazvo.

³Itii kuna Mwari, “Hakusi kutyisa ikoko kunoita mabasa enyu; mabasa enyu makuru zvokuti vavengi venyu vanotokotama kwamuri.

⁴Nyika yose inokugwadamirai, vanokuimbirai vachikurumbidzai vachiimba vachirumbidza zita renyu.” Dzepfunde

⁵Uyai muone zvakaitwa naMwari, zvaanoita pakati pavanhu zvinotyisa.

⁶Akasandura gungwa rikava nyika yakaoma; vanhu vakayambuka rukova rwuya netsoka. Pakadaro apo ngatipemberei nokufara maari.

⁷Anotonga nesimba rake nokusingaperi ziso rake rinogara riri pamarudzi avanhu. Vapanduki ngavarege kuzvikudza. Dzepfunde

⁸Rumbidzai Mwari wedu imi marudzi avanhu, mhururu yokumurumbidza ngainzwike.

⁹Akatichengeta tiri vapenyu, haana kurega tsoka dzedu dzichitsvedzemuka.

¹⁰Nokuti imi, Mwari, makatiedza; makatiedza sokuedzwa kunoitwa sirivha.

¹¹Makatipinza mumambure mukatipa musana unorwadza.

¹²Makaita kuti vanhu vatitsikirire zvavo musoro. Takapinda nomumoto nomumvura asi makatiunza kunzvimbo yamaguta.

¹³Ndichapinda mumba menyu nezvibayiro zvokupisa ndichiita zvandakatsidza,

¹⁴zvandakareva nomuromo wangu, zvandakatsidza nomuromo wangu pandaiva munhamo.

¹⁵Ndichapira kwamuri zvibayiro zvokupisa zvakakodzwa noutsi hwezvibayiro zvehondohwe. Ndichapira mupiro wehandira nembudzi. Dzepfunde.

¹⁶Uyai munzwe imi munotya Mwari ndikutaurirei zvaakandiitira.

¹⁷Ndakachema kwaari, ndikamurumbidza norurimi rwangu.

¹⁸Dai kuri kuti ndakafarira uipi mumwoyo mangu, TENZI vangadai vasina kuteerera.

¹⁹Asi zvechokwadi Mwari akateerera akanzwa munamato wokuchema kwangu.

²⁰Mwari ngaarumbidzwe nokuti haana kuramba munamato wangu kana kurega mwoyochena wake kwandiri.