Read Bhaibhiri Idzva rechiShona Nziyo 68 Bible Online

Nziyo 68 - Bhaibhiri Idzva rechiShona bible

Nziyo 68

¹Rumbo rwenyika kana yakunda Mwari ngaasimuke vavengi vake vaparadzwe. Vanomuvenga ngavatize pamberi pake.

²Sokuvhuvhutwa kunoitwa utsi, vatinheiwo. Sokunyongodeka kunoita namo pamoto; vakaipa ngavapararewo pamberi paMwari.

³Asi vakarurama ngavafare pamberi penyu; vapembere kwazvo nokufara pamberi paMwari. Ngavafarisise kwazvo norufaro.

⁴Imbirai Mwari, muimbirei muchirumbidza zita rake. Shaurai rumbo kuna iye anofamba nomumakore, zita rake ndiYahweh, pemberai nokufara pamberi pake.

⁵Mwari, munzvimbo yake inoera, ndiBaba wenherera nomudziviriri wechirikadzi.

⁶Mwari anopa vasina chavanacho musha wokugara. Anoburitsa vasungwa achivaendesa mukugarika asi vapanduki vanogara murenje.

⁷Imi Mwari pamakatungamirira vanhu venyu, pamakafamba nomurenje, Dzepfunde

⁸nyika yakandengendeka, matenga akadurura mvura nokuvapo kwenyu Mwari. Iro gomo reSinai rakandengendeka nokuvapo kwaMwari, Mwari weIsiraeri.

⁹Mwari makanaisa mvura yakawanda, makararamisa nhaka yenyu yakanga yavakuparara.

¹⁰Vanhu venyu vakaita musha mairi Mwari nokuda kokunaka kwenyu munowanisa varombo chokuvararamisa nacho.

¹¹TENZI anongoti taurei chete vanotakura mashoko acho vakawanda.[35] Vari kuti,

¹²“Madzimambo ehondo chaidzo anotiza, anotiza kumusha,” madzimai anenge avakutogovana zvakapambwa.

¹³Kunyange munhu ari mukati mezvipfuwo zvako mapapiro enjiva Isiraeri anenge achiiswa sirivha, mapapiro ayo achiiswa ndarama yeruvara rwemashizha manyoro.

¹⁴Samasimbaose paakamwararisa madzimambo, chando chakanaya paZarimoni.

¹⁵Gomo ravamwari, gomo reBhashani, gomo remisoro mizhinji, gomo reBhashani.

¹⁶Munotarisireiko neshanje imi makomo ane misoro mirefu kugomo rakasarudzwa naMwari kuti agare, TENZI paachagara nokusingaperi.

¹⁷Ngoro dzehondo dzaMwari igurusvusvu negurusvusvu kuwanda, mazana zvawo akazanirana. TENZI ari pakati padzo achibva kugomo reSinai achindopinda munzvimbo inoera.

¹⁸Makakwira gomo refu muchitungamirira nhapwa makagamuchira mutero mukati mavanhu, kunyange pakati pavanopandukira TENZI Mwari anogaramo.

¹⁹TENZI ngaarumbidzwe anotitakurira nhamo zuva nezuva. Mwari ndiye ruponeso rwedu. Dzepfunde

²⁰Mwari wedu ndiMwari woruponeso, TENZI Mwari ndiye anonunura kurufu.

²¹Mwari achapwanya misoro yavavengi vake, musoro uchine vhudzi womunhu anorambirira mukutadza kwake.

²²TENZI akati, “Ndichavaunza[36] kubva kuBhashani; ndichavaudza kubva kuudzamu hwegungwa

²³kuti mushambe tsoka dzenyu muropa, rurimi rwembwa dzenyu ruwanewo chikamu charwo chomuvengi.”

²⁴Dungwerungwe renyu rinooneka, Mwari dungwerungwe raMwari wangu, mambo wangu, richienda munzvimbo inoera.

²⁵Vaimbi vari mberi, vokuridza zvinoridzwa vari kokupedzisira; pakati pavo paine mhandara dzichiridza tambureni.

²⁶Rumbidzai Mwari mugungano guru rumbidzai TENZI imi vedzinza rokwaIsiraeri.

²⁷VokwaBhenjamini vedzinza diki ndivo vari kutungamira vakuru vakuru vokwaJudha hero zararira, vakuru vakuru vokwaZebhuroni navakuru vakuru vokwaNafutari.

²⁸Kokai simba renyu Mwari ratidzai simba ramakambotishandisira, Mwari

²⁹richibva kutemberi iri kuJerusaremu. Madzimambo kwavanouya nezvipo.

³⁰Tsiurai chikara chinogara mukati metsanga; handira dziri mukati memarudzi achiri mhuru zvadzo kusvikira vavakuhuta vachiunza sirivha, mwararisai marudzi anofarira hondo.[37]

³¹Nhumwa dzokwamambo dzichabva kuIjipiti Itiopia ichasimudza maoko ayo kuna Mwari.

³²Imbirai Mwari imi nyika dzapasi imbirai muchirumbidza TENZI. Dzepfunde

³³Vaimbire iye anofamba ari pamatenga, matenga akare. Iye anodzvova nezwi rake, izwi rake rine simba.

³⁴Itii Mwari ane simba, iye anobata ushe hweIsiraeri, simba rake riri mumatenga.

³⁵Mwari anotyisa ari muNzvimbo yake inoera Mwari weIsiraeri. Anopa ukuru nesimba kuvanhu vake. Mwari ngaarumbidzwe.