Read Bhaibhiri Idzva rechiShona Nziyo 69 Bible Online

Nziyo 69 - Bhaibhiri Idzva rechiShona bible

Nziyo 69

¹Munhu waMwari anochemera rubatsiro Ndinunureiwo Mwari nokuti mvura yandisvika mumutsipa.

²Ndavakunyura mumadhaka akadzika asina pokutsika. Ndapinda mumvura yakadzika. Mafashamo emvura avakutondifukidza.

³Ndaneta nokuchema; ndatooma pahuro. Mumaziso angu ndatoita rima nokumirira Mwari wangu.

⁴Vanondivenga pasina mhosva, vakawanda kupinda bvudzi romusoro wangu. Vangandiparadze vane simba; vanondirwisa namanyepo. Ndinofanira here kudzorera zvandisina kuba?

⁵Mwari, imi munoziva upenzi hwangu. Mhosva dzangu dzandakapara hadzina kuvandika kwamuri.

⁶Imi Mwari wehondo nehondo, vanotarisira mamuri ngavarege kunyadziswa pamusana pangu. Imi Mwari weIsiraeri, vanokutsvakai ngavarege kushorwa nokuda kwangu.

⁷Ndinodaro nokuti ndakatirira kushorwa pamusoro penyu; ndakadonha uso nokunyara.

⁸Ndava muenzi kuhama dzangu, mutorwa zvake kune vomumba medu.

⁹Nokuti shungu nemba yenyu dzandipedza, vanokushorai vanoshora ini.

¹⁰Pandakazvityora[38] nokutsanya zvakatondishoresa izvozvo.

¹¹Pandakapfeka masaga ndakave chiseko chenyika kwavari.

¹²Handichabvi pamuromo pavagere pamatare uye ndave rumbo rwezvidhakwa.

¹³Asi, ini, wandinonamata ndimi TENZI. Ndipindureiwo Mwari panguva yakakodzera nemwoyochena wenyu, wakadai kuwanda nokununura kwenyu kusina chinotadzisa.

¹⁴Ndinunureiwo kuti ndirege kunyura mumadhaka, ndinunureiwo kumhandu dzangu uye kumvura yakadzika.

¹⁵Musarege mafashamo achindifukidza kana kumedzwa nemvura yakadzika gomba ngarirege kundizaririra mariri.

¹⁶Ndipindureiwo TENZI nokuti mwoyochena wenyu wakanaka. Netsiye dzenyu nyoro dzakawanda, tendeukirai kwandiri.

¹⁷Musavanze uso hwenyu kuneni muranda wenyu nokuti ndapinda nhamo; kasirai kundipindura.

¹⁸Swederai pedyo neni mundinunure ndidzikinureiwo kumhandu dzangu.

¹⁹Munoziva wani kushorwa kwangu, nokunyara kwangu nokusaremekedzwa kwangu vavengi vangu vose munovaziva.

²⁰Kutukwa kwandiodza mwoyo zvokuti ndava kurasa mwoyo. Ndakatsvaka angandinzwirewo tsitsi asi pakanga pasina. Ndakatsvaka vangandinyaradze asi ndakavashaya.

²¹Vakandipa chepfu kuti ndidye; kuti ndipodze nyota vakandipa vhiniga kuti ndinwe.

²²Zvokudya zvinenge zvaiswa pamberi pavo ngazvive riva kwavari. Zvibayiro zvavo zvamazuva makuru, ngazvive musungo kwavari.

²³Ngavapofamadzwe maziso vatadze kuona. Ngavaite misana ine nhetemwa.

²⁴Vavirukirei nokushatirwa kwenyu, hasha dzenyu dzinovira dzivashaise mazano.

²⁵Pamatendhe pavo ngapaparare, matendhe avo ashaye anogara.

²⁶Nokuti vanotambudza wamunenge mapa shamhu. Wamunenge makuvadza vanotomutambudza zvakatonyanya.

²⁷Rambai muchingovabata nemhosva pamusoro pedzimwe mhosva, musamboti havana mhosva.

²⁸Ngavapfudzwe mubhuku ravapenyu. Varege kunyorwa mukati mavakarurama.

²⁹Asi ini ndiri kutambura; ndiri kurwadziwa. Ndisimudzeiwo Mwari nokuponesa kwenyu.

³⁰Ndicharumbidza zita raMwari norumbo ndichamukudza nokumutenda.

³¹Izvi zvichafadza TENZI kupinda nzombe kana handira dzine nyanga namatsiko.

³²Vari kudzvinyirirwa ngavazvione vagofara. Imi munotsvaka Mwari mwoyo yenyu ngaimuke.

³³Nokuti Mwari anonzwa varombo uye haashori vanhu vake vanenge vari muusungwa.

³⁴Denga napasi ngazvimurumbidze; ngaarumbidzwe namakungwa nazvose zvinofambamo.

³⁵Mwari achanunura Zioni agovakazve maguta okwaJudha vanhu [39] vachagaramo vachiriita ravo.

³⁶Vana vavaranda vavo vachiriita ravo uye vanoda zita rake vachagaramo.