Read Bhaibhiri Idzva rechiShona Nziyo 7 Bible Online

Nziyo 7 - Bhaibhiri Idzva rechiShona bible

Nziyo 7

¹Rwiyo rwokuchema kuna Mwari. Kuungudza kwaDhavhidhi kwaakaita kuna TENZI nezvaKushi wedzinza rokwaBhenjamini. TENZI Mwari wangu, mamuri ndimo mandinopotera. Ndiponeseiwo kune vanondironda mundinunure,

²vangadaro vakandibvambura-bvambura seshumba vakandizvuzvurudza pasina anondinunura.

³TENZI Mwari wangu kana pane chandakaita, kana ndakabata chakaipa namaoko angu,

⁴kana ndakadzorera mumwe wangu nechakaipa kana kupamba mhandu yangu pasina chikonzero,

⁵muvengi ngaandironde andibate atsokodzere zvake upenyu hwangu muvhu anditi rabada muhuruva. Dzepfunde

⁶Simukai TENZI nehasha dzenyu; zvisimudzei murwise vavengi vangu vane hasha. Mukai Mwari wangu, ndimi makatema wani kuti pave neruenzaniso.

⁷Gungano ramarudzi avanhu ngarikuunganirei. Imi pamusoro pegungano iroro mugare pachigaro chenyu chapamusoro.

⁸TENZI ndiye anotonga marudzi avanhu. TENZI ratidzai kuti ndakarurama uye kuti ndiri pachokwadi.

⁹Uipi hwavakaipa ngaupere, asi vakarurama vabudirire, imi munoedza pfungwa nomwoyo yavanhu, imi Mwari akarurama.

¹⁰Mwari ndiye nhoo yangu anonunura vano mwoyo yakarurama.

¹¹Mwari mutongi akarurama; pane mhosva anoti pane mhosva mazuva ose.

¹²Kana munhu akasapinduka, Mwari anorodza bakatwa rake anotatamura nokukunga uta hwake,

¹³anogadzirira zvombo zvake zvinouraya agoita kuti miseve yake ive moto moto.

¹⁴Wakaipa anofunga zvakaipa agoti shutu kuzara nomusikanzwa ozoburitsa nhema.

¹⁵Anochera hunza, woifonon'ona ozowira mugomba raachera iroro.

¹⁶Musikanzwa wake unomupfukira utsinye hwake hunomukoromokera.

¹⁷Ndinotenda TENZI noruenzaniso rwake. Ndicharumbidza zita raTENZI Wokumusorosoro.