Read Bhaibhiri Idzva rechiShona Nziyo 71 Bible Online

Nziyo 71 - Bhaibhiri Idzva rechiShona bible

Nziyo 71

¹Ndinopotera kwamuri TENZI musaite kuti ndinyadziswe.

²Sezvamakarurama kudai ndinunureiwo, ndisunungureiwo, rerekerai nzeve yenyu kwandiri mundinunure.

³Ivai kwandiri bako rokupotera, nhare yakasimba yokundinunura nokuti ndimi dombo rangu nenhare yangu.

⁴Ndinunureiwo Mwari wangu kumaoko avanhu vakaipa; kumaoko anombandika omunhu asakarurama anoutsinye.

⁵Ndimi chitarisiro changu TENZI, wandinovimba naye kubvira pauduku hwangu TENZI.

⁶Ndakatsamira pamuri kubvira pakuberekwa kwangu, ndimi makanditora munhumbu maamai vangu, ndinoramba ndichingokurumbidzai chete.

⁷Ndakava chinhu chinokahadzisa kuvazhinji asi imi ndimi botero rangu rakasimba.

⁸Kukurumbidzai hakuchabvi pamuromo pangu uye ndichaswera muswere wose ndichikupai mbiri.

⁹Musandirase kana ndakwegura musandifuratire kana ndapera simba.

¹⁰Nokuti vavengi vangu vanotaura nezvangu, vanotsvaka zvokundiuraya, vanorangana

¹¹vachiti, “Mwari wamurasa ngatimurondei timubate, nokuti hapana anomununura.”

¹²Mwari regai kuva kure neni; Mwari wangu chimbidzai kuzondibatsira.

¹³Vanondipa mhosva ngavanyadziswe vaparadzwe. Ngavazadzwe nokushorwa nokunyadziswa vanotsvaka zvokundirwadzisa.

¹⁴Ndicharamba ndichingotarisira uye ndichakurumbidzai kakawanda.

¹⁵Muromo wangu uchataura nezvamabasa enyu akarurama uye zuva rose nezvokununura kwenyu nokuti handikwanisi kuzviverenga.

¹⁶Ndichauya nesimba raTENZI Mwari kuzoparidza ururami hwenyu, hwenyu imi chete.

¹⁷Mwari makandidzidzisa kubva pauduku hwangu, kusvikira pari zvino ndinoparidza mabasa enyu anoshamisa.

¹⁸Saizvozvo kusvika pakukwegura kwangu napakuchena musoro, Mwari musandirase kusvikira ndaparidza simba renyu kuzvizvarwa zvose zvichauya.

¹⁹Simba renyu noururami hwenyu Mwari zvinosvika kumatenga-tenga chaiko. Imi makaita zvinhu zvikuru. Mwari ndiani akaita semi?

²⁰Makandionesa nhamo nepfumvu dzakawanda, muchandimutsazve nokundiburitsa munzvimbo yapasi yakadzika.

²¹Muchapamhidzira ukuru hwangu muchindinyaradzazve.

²²Ndichakurumbidzai nedimbwa ndichirumbidza kuva pachokwadi kwenyu. Mwari wangu ndichakurumbidzai nechipendani, imi mutsvene weIsiraeri.

²³Miromo yangu ichapururudza norufaro pandinoimba ndichikurumbidzai uyewo iyeni nokundinunura kwamakaita.

²⁴Rurimi rwangu ruchakurukura zuva rose nezvoururami hwenyu nokuti vaida kundikuvadza vakanyadziswa nokushorwa.