Read Bhaibhiri Idzva rechiShona Nziyo 72 Bible Online

Nziyo 72 - Bhaibhiri Idzva rechiShona bible

Nziyo 72

¹Kunamatira Mambo Mwari itai kuti mambo ave neruenzaniso rwenyu uye ururami hwenyu kumwana wokumbahuru.

²Ngaatonge vanhu venyu noururami atonge varombo venyu noruenzaniso.

³Makomo ngaave nokubudirira kwavanhu, zvikomo zvive noururami.

⁴Ngaadzivirire vanhu varombo anunure vasina chavanacho. Aparadze vanodzvinyirira.

⁵Chero zuva richiri kupenya vanhu ngavakutyei uye chero mwedzi uchiri kuvheneka pazvizvarwa zvose.

⁶Ngaave semvura inonaya pauswa hwachekererwa uye semvura inonaya ichidiridza pasi.

⁷Panguva yake, ururami ngahutekeshere rugare rudzike midzi kusvikira mwedzi usisipo.

⁸Kutonga kwake ngakubve kune rimwe gungwa kusvika kune rimwe, kubva kurwizi rwaYufuretesi kusvika kwakagumira nyika.

⁹Vavengi vake ngavamugwadamire; mhandu dzake dzinanzviswe pasi.

¹⁰Madzimambo okuTashishi nookuzvitsuwa ngaatere mutero kwaari. Madzimambo okuShebha nokuSebha ngavauye nezvipo.

¹¹Madzimambo ose ngaamugwadamire marudzi ose amushandire.

¹²Nokuti anonunura asina chaanacho kana achichema-chema, murombo naasina anomubatsira.

¹³Anonzwira tsitsi akarukutika naasina chaanacho achiponesa vasina chavanacho muupenyu.

¹⁴Anovanunura upenyu mukudzvinyirirwa noutsinye uye ropa ravo rakakosha kwaari.

¹⁵Ngaararame kwenguwa ndefu uye apiwe ndarama yeShebha. Ngaarambe achinamatirwa, ngaakumbirirwe makomborero zuva rose.

¹⁶Nyika ngaive nembeswa zhinji dziti nemisoro yamakomo neyaneya, michero yadzo iite seyokuRebhanoni. Maguta azare navanhu souswa hwomusango.

¹⁷Zita rake ngarigare nokusingaperi nembiri yake ivepo chero panenge zuva richirivhenekera. Nokuda kwake vanhu vachatoti, “Mwari wakomborera.” Marudzi achamuti, “Akakomborerwa.”

¹⁸TENZI ngaarumbidzwe Mwari waIsiraeri ndiye oga anoita zvinoshamisa.

¹⁹Zita rake ngarirumbidzwe nokusingaperi. Mbiri yake ngaizare pasi pose. Ameni Ameni.

²⁰Minamato yaDhavhidhi, mwana waJese, inoperera pano.