Read Bhaibhiri Idzva rechiShona Nziyo 73 Bible Online

Nziyo 73 - Bhaibhiri Idzva rechiShona bible

Nziyo 73

¹Rwiyo rwaAsafu. Chokwadi Mwari wakanaka akarurama[40] kuna vakachena mumwoyo.

²Asi ini ndakapotsa ndapingirishwa, makumbo angu akanga avakutoda kutsvedza.

³Nokuti ndaive neshanje navanozvitutumadza pandakaona kubudirira kwavakaipa.

⁴Nokuti havana chinovarwadza, miviri yavo yakasimba kuti gwindiri.

⁵Havana nhamo dzina vamwe, havatambudziki sezvinoita vamwe vanhu.

⁶Nokudaro kuzvitutumadza ndicho chishongo chavo chomumutsipa. Kuita zvechisimba ndiyo hanzu yavo yavanopfeka.

⁷Maziso avo akatozvimba nokukora, mwoyo yavo inotutumira noupenzi.

⁸Vanonyomba nokutaura nounyengedzi, vanotyityidzira vanhu vachizvikudza vachiti vachavatonga zvakaipa.

⁹Vanotuka denga vachidzongodza nyika nezvinobva pamuromo pavo.

¹⁰Nezvo vanhu vanopinduka vovarumbidza vachishaya chakaipa mavari.

¹¹Vanototi Mwari angazvizive sei, iye Wokumusorosoro chaangazivewo chii.

¹²Ndizvo zvakaita vakaipa izvi, vanogara vakagarikana, upfumi vachingoita matutu matutu.

¹³Ndakachengetera pasina mwoyo wangu wakachena, chandakazvichengetera maoko angu asina chaakabata chakaipa hapana.

¹⁴Nokuti ndinotambudzwa zuva rose uye ndinorangwa mangwanani oga oga.

¹⁵Dai kuri kuti ndaiti regai nditaure zvangu ndichidai. Ndingadai ndisina kuva pachokwadi kuzvizvarwa zvavana venyu.

¹⁶Pandakati regai ndiedze kuzvinzwisisa izvi, chakave chinhu chakaomarara kwazvo

¹⁷kusvika ndaenda munzvimbo yenyu inoera, ndopandakazoziva magumo avo.

¹⁸Zvirokwazvo munovaisa panotsvedza, munoita kuti vapinde mukuparadzwa.

¹⁹Vanoyerekana vaparadzwa munovatsvaira nezvinotyisa.

²⁰Vanoita sechiroto munhu paunomuka. Pamunosimuka munovatora sechinhu pasina.

²¹Pandakanga ndasuruvara, ndabaiwa mwoyo,

²²ndakanga ndazungaira ndisina chandinoziva ndakaita semhuka zvayo kwamuri.

²³Kunyange zvakadaro zvazvo ndinoramba ndinemi nguva dzose munondibata ruoko rworudyi.

²⁴Munonditungamirira namazano enyu mushure mezvo muchandigamuchira mumbiri yenyu.

²⁵Ndiani wangu ari kudenga kusiya imi? Uye hapana chandinoda panyika kusiya imi.

²⁶Nyama yangu nemwoyo wangu zvingakundike zvazvo asi Mwari ndiye simba[41] rangu uye ndiye mugove wangu nokusingaperi. Nokuti vanogara kure nemi vanoparara

²⁷imi munoparadza vanoita unzenza hwokusava pachokwadi nemi.

²⁸Chakandinakira ini kugara padyo naMwari. Mwari ndiye wandakaita wokupotera naye kuti ndiparidze mabasa enyu ose.