Read Bhaibhiri Idzva rechiShona Nziyo 74 Bible Online

Nziyo 74 - Bhaibhiri Idzva rechiShona bible

Nziyo 74

¹Munamato wokukumbira kununurwa kwenyika Mwari makatirasireiko zvachose munovirukirireiko nehasha hwai dzedanga renyu?

²Yeukai sangano renyu ramakazviwanira pasi chigare, ramakanunura kuti rive rudzi rwenhaka yenyu. Yeukai gomo reZioni ramakombogara.

³Simudzai tsoka mumbofambafamba kumatongo okugara nokugara; muvengi akaparadza zvose munzvimbo inoera.

⁴Vavengi venyu vakadzvova mukati menzvimbo yenyu yokusanganira, vakamisa mireza yavo sechiratidzo.

⁵Vaiita savanhu vanovheyesa matemo, vari kutema mujokochwa remiti namatemo.

⁶Vakapwanya mapuranga ose ane zvivezwa vakazvipwanya namatemo nenyundo.

⁷Vakapisa nomoto nzvimbo yenyu inoera vakan'oresa nzvimbo inogara zita renyu.

⁸Vakazviti nechomumwoyo tichanyatsovakurira, vakapisa munyika nzvimbo dzose dzaMwari dzokunamatira.

⁹Hatichambooni zvishamiso zvedu; hatichina muporofita. Hapana anoziva kuti zvichatora nguva yakadii.

¹⁰Muvengi achadada kusvikira rini nhai Mwari? Mhandu yenyu ichatsvinyira zita renyu narini here?

¹¹Ko munorambireiko kutambanudza ruoko rwenyu? Munorambirei makagumbata ruoko rwenyu rworudyi.

¹²Asi Mwari Mambo wangu ndewopasichigare, ndimi munonunura mukati menyika.

¹³Makaganhura gungwa nesimba renyu mukadimbura misoro yezigaranyanya mumvura.

¹⁴Makapwanya misoro wengwena; makaipa sechokudya kuzvikara zvomurenje.

¹⁵Makatubura zvisipiti netukova, makapwisa hova dzisingapwi.

¹⁶Masikati ndeenyu nousiku ndohwenyu. Ndimi makaisa mavheneko nezuva.

¹⁷Makaisa miganho yenyika, ndimi makaisa zhizha nechirimo.

¹⁸TENZI rangarirai kuti muvengi anonyomba zvakadii uye kuti mapenzi avanhu anoshora sei zita renyu.

¹⁹Regai kuisa njiva iyi, vanhu venyu, mumaoko ezvikara musakanganwe upenyu hwavarombo venyu nokusingaperi.

²⁰Itai hanya nechitenderano chenyu nokuti nzvimbo dzine rima munyika muzere misha inoshandiswa zvechisimba.

²¹Vanodzvinyirirwa ngavarege kunyadziswa. Varombo navasina chavanacho ngavarumbidze zita renyu.

²²Simukai Mwari muzvimiririre muyeuke kukunyombai kunoita mapenzi zuva rose.

²³Musakanganwe ruzha runoitwa navavengi venyu. Mhirizhonga yemhandu dzenyu inoramba yakasimudzirwa.