Read Bhaibhiri Idzva rechiShona Nziyo 77 Bible Online

Nziyo 77 - Bhaibhiri Idzva rechiShona bible

Nziyo 77

¹Munamato kuna Mwari ane tsitsi kana zvinhu zvaipa Ndinoridza mhere kuna Mwari, mhere kuna Mwari kuti andinzwe.

²Nezuva rokutambudzika kwangu ndinotsvaka TENZI. Usiku ndinosimudza maoko angu ndisinganeti, mweya wangu unoramba kunyaradzwa.

³Ndinofunga Mwari ndigoungudza. Ndikati rangarirei mweya wangu unobva washaya simba. Dzepfunde

⁴Usiku munoita kuti ndirare ndakasvinura ndinobva ndatambudzika zvokutotadza kutaura.

⁵Ndinombofunga nezvamazuva akare, ndinoyeuka makore enguva yakare.

⁶Ndinozvibvunzurudza mumwoyo mangu usiku, ndinorangarira ndichitsvagurudza mumweya wangu.

⁷Mwari andirasa zvachose here? Haachandifaririzve here?

⁸Mwoyochena wake wapera zvachose here? Zvaakanditsidzira zvakabva zvapera here?

⁹Mwari akakanganwa kuita tsiye nyoro here? Hasha dzake dzavhiringidza tsitsi dzake here? Dzepfunde

¹⁰Ini ndinoti chinhu chinondirwadza kuti kuita kwaMwari zvine simba kwasanduka.

¹¹Ndinoyeuka zviito zvaMwari. Hongu ndinorangarira zviito zvenyu zvepasichigare.

¹²Ndichanyatsofungisisa mabasa enyu ose. Ndigozvibvunzurudza nezvamabasa enyu esimba.

¹³Nzira yenyu Mwari itsvene ndoupi mwari mukuru saMwari wedu?

¹⁴Muri Mwari anoita zvishamiso makaratidza simba renyu pakati pavanhu.

¹⁵Makanunura vanhu venyu nesimba roruoko rwenyu vana vokwaJakobho naJosefi. Dzepfunde.

¹⁶Mvura payakakuonai Mwari, mvura payakakuonai yakatya. Hongu hwenje hwakadedera.

¹⁷Makore akadurura mvura, matenga akatinhira, miseve yenyu yakavaima mativi ose.

¹⁸Kupwatika kwemheni yenyu kwakanga kuri muchamupupuri mheni dzenyu dzaipenyesa pasi nyika yakadedera ikandengendeka.

¹⁹Mugwagwa wenyu waipfuura nomugungwa; nzira yenyu yaipfuura nomumvura zhinji, asi tsoka dzapamakatsika hadzina kuoneka.

²⁰Makatungamirira vanhu venyu sedanga rehwai vari mumaoko aMosesi naAroni.