Read Bhaibhiri Idzva rechiShona Nziyo 79 Bible Online

Nziyo 79 - Bhaibhiri Idzva rechiShona bible

Nziyo 79

¹Nyika inochemera Mwari kununurwa Mwari vanhu vechirudzi vakapinda munhaka yenyu vakan'oresa Temberi yenyu inoera vakaita Jerusaremu dongo.

²Vakapa zvitunha zvavaranda venyu kushiri dzedenga kuti dzidye zvadzo uye nyama yavarurami venyu kuzvikara zvenyika.

³Vakadeura ropa ravo semvura munharaunda yeJerusaremu, asi pakanga pasina wokuvaviga.

⁴Tinoshorwa navavakidzani nesu, tinonyombwa nokusekwa navakatipoteredza.

⁵Kusvikira riniko nhai TENZI? Muchashatirwa kusvikira nokusingaperi here? Shanje yenyu ichanganduma somoto here?

⁶Virukirai vechirudzi nehasha, vasingakuzivei uye umambo husingadaidzi zita renyu

⁷nokuti vakazhanya vokwaJakobho vakaparadza musha wavo.

⁸Musatiyeukirewo zvitadzo zvedu zvakare.[44] Tsitsi dzenyu ngadziuye nokukurumidza dzitichingurewo nokuti tasakara zvikuru.

⁹Tibatsireiwo Mwari mununuri wedu kuitira mbiri yezita renyu. Tinunurei mutiregererewo zvitadzo zvedu kuitira zita renyu.

¹⁰Vechirudzi vangarambireiko vachiti, “Mwari wavo aripi.” Ratidzai vechirudzi isu tichizviona kuti munotsiva ropa ravaranda venyu rinenge radeurwa.

¹¹Kugomera kwomusungwa wenyu ngakusvike kwamuri, imi muchengetedze vakatongerwa kufa.

¹²Tsividzai kakapetwa kanomwe vatakavakidzana navo zvavakakushorai nazvo imi TENZI.

¹³Ipapo isu vanhu venyu, hwai dzedanga renyu tichakutendai nokusingaperi pazvizvarwa nezvizvarwa, tichakurukura mbiri yenyu.