Read Bhaibhiri Idzva rechiShona Nziyo 83 Bible Online

Nziyo 83 - Bhaibhiri Idzva rechiShona bible

Nziyo 83

¹Kukumbira Mwari kuti vavengi veIsiraeri vakundwe Mwari regai kunyarara, regai kungoti zii-i kudaro, Mwari kana kuramba makangoti zirikiti kunyarara.

²Tarisai muone kuti vavengi venyu vari kuita bongozozo, vanokuvengai vari kusimudza musoro.

³Vanoita mazano omuchivande, okurwisa vanhu venyu, vanorangana pachavo vanhu vamunochengetedza.

⁴Vanoti, “Ngativatsvairei rudzi rwose, zita reIsiraeri rirege kuzomboyeukwazve.”

⁵Vanobva vaita rimwe, kubatana kwazvo vachiita chitsidzirano chokurwisa imi

⁶pamwechete nevemba yokwaEdhomu nevemba yokwaIshimaeri nevekwaMoabhu nevokwaHagari

⁷nevekwaGebhari, nevekwaAmoni nevekwaAmareki, nevechiFirisitia navagari vokuTire.

⁸VaAsiria vabatanawo navo ndivo vabatsiri vakuru nevokwaRoti. Dzepfunde.

⁹Vaitei sezvamakaita vaMidhia kana zvamakaita Sisera naJabhini kurwizi rweKishoni.

¹⁰Vakaparadzwa kuEndori, vakave mupfudze wevhu.

¹¹Itai kumakurukota avo sezvamakaita kuna Orebhu naZeebhu; machinda avo ose sezvakaita Zebha naZarimuna

¹²vakati, “Ngatizvitorerei zvedu mafuro aMwari.”

¹³Mwari wangu vaitei sohuruva yechamupupuri sehundi inopupurutswa nemhepo.

¹⁴Sokupisa kunoita moto sango sezvinoita rimi rinoririmisa makomo,

¹⁵saizvozvo varondei nedutu renyu muvatyisidzire nemhepo ine simba.

¹⁶Vadonhedzei uso nenyadzi kuti vatsvake zita renyu TENZI.

¹⁷Ngavanyadziswe vanyare nokusingaperi ngavaparadzwe zvinonyadzisa.

¹⁸Ngavazive kuti imi moga, mune zita rokuti Yahweh ndimi Mukurukuru pasi pose.