Read Bhaibhiri Idzva rechiShona Nziyo 90 Bible Online

Nziyo 90 - Bhaibhiri Idzva rechiShona bible

Nziyo 90

¹TENZI ndimi manga muri musha wedu pazvizvarwa zvose.

²Makomo asati aberekwa musati masika nyika napasi pose. Muri Mwari narini narini, chingo nechingo.

³Munopindura munhu kuva huruva munongoti vanhu, “Dzokerai kune zvamakanga muri.”

⁴Nokuti churu chamakore kwamuri chakangoita sazuro kana chapfuura kana sakanguvana kokugaririra usiku.

⁵Munotsvaira vanhu, vakaita sechiroto, vakaita souswa hunosvibirira mangwanani.

⁶Kumangwanani hunomuka hwakasvibirira kumanheru hunouna hwosvava.

⁷Nokuti hasha dzenyu dzinotiparadza. Tinobva taparara nokutya kushatirwa kwenyu.

⁸Munoisa uipi hwedu pamberi penyu uye zvitadzo zvedu zvapachivande munozviisa pachena pauso hwenyu.

⁹Mazuva edu ose anopfuura imi makashatirwa; makore edu anopera sefemo.

¹⁰Makore oupenyu hwedu makumi manomwe kune vakasimba vanoita makumi masere asi akanaka acho inongova nhamo namatambudziko, haatani kupera, isuwo tobva tobhururuka toenda.

¹¹Ndiani anoziva panosvika hasha dzenyu. Hasha dzenyu dzakangoenzana nokutyisa kwenyu

¹²saka tidzidziseiwo kuverenga mazuva edu kuti tingwarire.

¹³Muchasvika kupiko nhai TENZI? Dzokai zvenyu muitire varanda venyu ngoni.

¹⁴Tiratidzeiwo mwoyochena wenyu mangwanani kuti tipembere kufara uye tifare mazuva edu ose.

¹⁵Tipeiwo kufara kwamazuva akaenzana namazuva amakatirwadzisa uye kwamakore atakaona nhamo.

¹⁶Ratidzai mabasa[46] enyu kuvaranda venyu uye mbiri yenyu kuvana vavo.

¹⁷Nyasha dzatenzi Mwari wedu ngadzive patiri. Basa ramaoko edu muite kuti ribudirire. Hongu ngaribudirire basa ramaoko edu.