Read Bhaibhiri Idzva rechiShona Nziyo 92 Bible Online

Nziyo 92 - Bhaibhiri Idzva rechiShona bible

Nziyo 92

¹Rumbo rwomururami rwokurumbidza Chinhu chakanaka kurumbidza TENZI uye kuimba tichirumbidza zita renyu imi Wokumusorosoro.

²Kuparidza mwoyochena wenyu mangwanani uye kutendeka kwenyu usiku

³nembira nedimbwa nechipendani.

⁴Nokuti imi TENZI makaita kuti ndifare nebasa renyu. Ndinopururudzira basa ramaoko enyu norufaro.

⁵Hakusi kukura ikoko kwakaita mabasa enyu TENZI. Pfungwa dzenyu dzakadzama zvikuru.

⁶Munhu akapata haangazvizivi. Dununu haringazvizivi izvi

⁷zvokuti kunyange zvazvo vakaipa vangatutumuke kukura souswa uye kuti vaiti vezvakaipa vangabudirire zvavo, chavo kuparadzwa nokusingaperi.

⁸Asi imi TENZI muri wopamusorosoro nokusingaperi.

⁹Nokuti tarisai muone mhandu dzenyu TENZI tarisai muone kuti mhandu dzenyu dzichaparara vaiti vezvakaipa vachamwarariswa.

¹⁰Asi imi makandisimbaradza senyanga yenyati, makandizodza namafuta mutsva.

¹¹Ndakaona namaziso angu kuputsika kwavavengi vangu ndakanzwawo nenzeve dzangu kuparara kwavakaipa vanondirwisa.

¹²Vakarurama vanobudirira sokukura kunoita murara uye vanokura somusidhari wokuRebhanoni.

¹³Vanosimwa muimba yaTENZI, vanobudirira mumipanda yaMwari wedu.

¹⁴Vanobereka michero ivo vakwegura zvavo, vanoramba vari vanyoro vakasvibira

¹⁵kuratidza kuti TENZI ari pachokwadi ndiye dombo rangu maari hamuna chakaipa.