Read Bhaibhiri Idzva rechiShona Tsumo 10 Bible Online

Tsumo 10 - Bhaibhiri Idzva rechiShona bible

Tsumo 10

¹Tsumo dzaSoromoni. Mwanakomana anoungwaru anofadza baba asi benzi romwana inhamo zvayo kuna amai.

²Upfumi hunowanikwa zvakaipa, hauna chimuko asi ururami hunoponesa kurufu.

³Tenzi haaregi mururami achifa nenzara asi zvinosuwirwa navakaipa anozviisa rutivi.

⁴Kugara maoko kunounza urombo asi kugwinyisa maoko kunopfumisa.

⁵Mwana anounganidza pazhizha mwana akangwara asi mwana anorara pakukohwa anonyadzisa.

⁶Munhu akarurama ane chikomborero pamusoro asi muromo womunhu wakaipa unovanza utsinye.

⁷Kufunga nezvemururami chikomborero asi zita romuipi rinoora.

⁸Munhu akangwara anoteerera mitemo asi benzi rinotaura chero charataura rinoparara.

⁹Anofamba muchokwadi haana chinomuwana asi anofamba zvisizvo achawanikidzwa.

¹⁰Anochonya ziso anopinza nhamo asi anotsiura zvinechivindi anounza rugare.

¹¹Muromo womunhu akarurama chisipiti choupenyu, asi muromo womuipi unoviga utsinye.

¹²Ruvengo runomutsa gakava, asi rudo runofukidza zvikanganiso zvose.

¹³Ungwaru hunowanikwa pamuromo pomunhu anonzwisisa asi munhu asina pfungwa shamhu inogara iri pamusana pake.

¹⁴Vangwaru vanopfundira ruzivo rwavo mumwoyo asi muromo webenzi unounza kuparadzwa.

¹⁵Upfumi hwomupfumi iguta rake rakasimba urombo hwavarombo ndihwo hunovaparadza.

¹⁶Basa romururami rinounza upenyu mubayiro wavaipi unosvitsa kuchitadzo.

¹⁷Anochengeta zvidzidziso ari munzira inoenda kuupenyu asi anoramba kutsiurwa anorasika.

¹⁸Munhu anoviga ruvengo munyepi munhu anoreva mumwe ibenzi.

¹⁹Munhu anowanza twokutaura kukanganisa hakushaike asi anozvibata pakutaura akachenjera.

²⁰Rurimi rwomururami isirivha yakanakisa asi pfungwa dzomuipi hadzina maturo.

²¹Miromo yomururami inogutsa vakawanda asi mapenzi anofa pamusana pokushaya ruzivo.

²²Chikomborero chaTenzi chinopfumisa, hapana kushanda kunohupamhidzira.

²³Kune benzi kuita zvakaipa unotova mutambo asi kumunhu anonzwisisa kuita zvinoungwaru ndozvinomufadza.

²⁴Zvinozezwa nowakaipa ndizvo zvinomuwira asi zvinosuwirwa nomururami anozvipihwa.

²⁵Kana chamupupuri chikapfuura muipi panosara pasisina asi mururami akadzika midzi nokusingaperi.

²⁶Zvinongoita vhiniga kumazino uye utsi kumaziso ndozvakaita tsimbe kune anomutuma.

²⁷Kutya Mwari kunorebesa upenyu asi makore omuipi achapfupikiswa.

²⁸Chitarisiro chomururami rufaro asi zvinotarisirwa nowakaipa zvinongoti mwarara.

²⁹Tenzi inhare kumunhu wemaitiro akarurama asi anoparadza vaiti vezvakaipa.

³⁰Vakarurama havatipurwi asi vaipi munyika havamugari.

³¹Muromo womururami unounza ungwaru asi rurimi rwouipi ruchadimurwa.

³²Miromo yomururami inoziva zvinovaka asi muromo wavaipi zvounyengedzi.