Read Bhaibhiri Idzva rechiShona Tsumo 11 Bible Online

Tsumo 11 - Bhaibhiri Idzva rechiShona bible

Tsumo 11

¹Tenzi anosema chikero chokunyengedza asi anofadzwa nechikero chiri pamwero.

²Kuzvitutumadza kukauya kunoteverwa nokunyadziswa asi vanozvirereka ndivo vanoungwaru.

³Kuva pachokwadi kwavarurami kunovatungamirira asi kukombama kwavanyengedzi kunovaparadza.

⁴Upfumi hauna chahunobatsira pazuva rehasha asi ururami hunonunura kurufu.

⁵Ururami hwaasina mhosva hunoita kuti nzira yake irambe yakati tasa asi muipi anoputsirwa pasi nouipi hwake.

⁶Ururami hwavakatendeka hunovanunura asi vanyengedzi vanobatwa noruchiva rwavo.

⁷Kana wakaipa ofa chitarisiro chake chinobva chati mbombombo uye zvinotarisirwa nomuipi zvinoti mwarara.

⁸Mururami anonunurwa kunhamo asi muipi anotopindana nayo nhamo.

⁹Asiri munamati anogona kuparadza mumwe wake nomuromo wake asi varurami vanoponeswa noruzivo.

¹⁰Zvikanakira vakarurama guta rinopembera nokufara. Kana vakaipa vakaparara kunofarwa zvokupembera kwazvo.

¹¹Guta rinorumbidzwa pamusana pechikomborero chavakarurama asi rinoparadzwa nomuromo wavakaipa.

¹²Munhu anoninipisa mumwe wake, kushaya pfungwa munhu anonzwisisa anonyarara.

¹³Munhu anofamba achiita makuhwa anoburitsa pachena zvinhu zvakavandika asi munhu anemwoyo kwawo anochengetedza zvinhu zvakavandika.

¹⁴Kana pasina anotungamira, rudzi runoputsikira pasi kukurira kunobva mukunyatsoronga.

¹⁵Anomiririra chikwereti chomunhu waasingazivi zvichamutemesa musoro. Munhu anovenga kumiririra chikwereti chomumwe akagarika.

¹⁶Mukadzi ano hunhu anoremekedzwa asi murume anoita zvechisimba chaanowana upfumi.

¹⁷Murume ane mwoyo wakanaka zvinhu zvinomufambira zvakanaka asi murume ane mwoyo wohutsinye anozvikuvadza.

¹⁸Munhu wakaipa anowana mubayiro wounyengedzi asi anodyara ururami anowana mubayiro kwawo.

¹⁹Anosimbirira muururami anorarama asi anoronda uipi anofa.

²⁰Vanhu vane mwoyo wakaipa Tenzi haavadi asi vasina mhosva anofadzwa navo.

²¹Iva nechokwadi chokuti munhu akaipa anorangwa chete asi vana vavakarurama vanonunurwa.

²²Zvakangoita ringi rendarama riri mumhuno yenguruve ndozvakaita mukadzi ano runako asi asinganzwisisi.

²³Chido chomururami chinopera nomune zvakanaka asi chitarisiro chavakaita kuitirwa hasha.

²⁴Mumwe ndimupanogombe asi achitobva atopfumisisa mumwe ndikanyimiramundiro asi achiva murombo.

²⁵Munhu anopa achapfuma anogutsa vamwe achagutswawo.

²⁶Vanhu vanoti munhu anoomerera nembesanwa dai awana chinomuwana asi anodzitengesa ane chikomborero.

²⁷Munhu anotsvaka zvakanaka anotsvaka kudiwa asi uipi hunouya kune anoutsvaka.

²⁸Munhu anovimba nepfuma achasvava asi mururami achapfumvudza seshizha nyoro.

²⁹Anotambudza vemumba make mhepo ndiyo nhaka yake benzi richava muranda wavakangwara.

³⁰Muchero wavakarurama muti woupenyu asi kusachengeta mutemo kunoparadzisa upenyu.

³¹Kana wakarurama achiwana mubayiro wake panyika ko kutozoti wakaipa nomutadzi?