Read Bhaibhiri Idzva rechiShona Tsumo 12 Bible Online

Tsumo 12 - Bhaibhiri Idzva rechiShona bible

Tsumo 12

¹Munhu anoda kudzidziswa anoda ruzivo asi asingadi kutsiurwa imhuka yomunhu.

²Munhu wakanaka anodiwa naTenzi asi munhu wohujarijari anomupa mhosva.

³Munhu haadziki midzi pamusana pouipi mudzi womururami haitipurwi.

⁴Mukadzi akarurama indaza kumurume wake asi mukadzi anonyadzisa akaita senhuta yamapfupa kumurume wake.

⁵Pfungwa dzavarurami dzakarurama mazano avaipi ndookunyengedza.

⁶Mazwi avakaipa ndookuuraya asi muromo womururami ndookununura.

⁷Vakaipi vakangoputsirwa pasi zvinobva zvavaperera asi musha womururami unoramba wakamira.

⁸Munhu anorumbidzwa pamusana pouchenjeri hwake asi munhu ane pfungwa dzakaminama anoshorwa.

⁹Zviri nani kuva munhu anoonekwa somunhuwo zvake asi achizviriritira pane munhu anozviita wapamusorosoro asi chokudya asina.

¹⁰Akarurama ane hanya noupenyu hwezvipfuo zvake asi akaipa chaanoti tsiye nyoro utsinye.

¹¹Munhu anorima munda wake anowana chokudya chakawanda asi munhu anotandana nezvisina maturo kushaya musoro.

¹²Muipi anochochora chinobatwa nemambure avaipi asi mudzi womururami unoita muchero.[10]

¹³Munhu akaipa anozviteya nomuromo wake asi akarurama anopunyuka nhamo.

¹⁴Munhu anogutiswa nezvakanaka, uri muchero wezvinobva pamuromo pake uye munhu achadzorerwa zvaakaita namaoko ake.

¹⁵Maitiro ebenzi akanaka kwariri asi munhu mungwaru anoteerera mazano aanopiwa.

¹⁶Kushatirwa kwebenzi kunobva kwaoneka pakarepo asi munhu akangwara haaite hanya nokushatiriswa.

¹⁷Munhu anotaura chokwadi anoburitsa pachena zvakarurama asi chapupu chenhema chinoburitsa unyengedzi.

¹⁸Kune vamwe vanotaura zvinobaya mwoyo sebakatwa asi rurimi rwowakachenjera runoporesa.

¹⁹Muromo unotaura chokwadi hauwire pasi narini asi zvemuromo wenhema hazvina kwazvinosvika.

²⁰Mumwoyo yavane bangano rakaipa, mune unyengedzi asi mune vanoronga zvakanaka mune rufaro.

²¹Hakuna chakaipa chinowira mururami asi vaipi nhamo dzinovamomotera.

²²Miromo inoreva nhema haidiwe naTenzi asi vanotendeseka mukuita kwavo anofadzwa navo.

²³Munhu akangwara anoviga ruzivo rwake asi mapenzi anoparidzira upenzi hwavo.

²⁴Munhu anogwinyisa maoko achatonga asi anogara maoko achaendeswa kuchibharo.

²⁵Kuzvidya mwoyo kunoonza asi shoko rakanaka rinomunyevenutsa mwoyo.

²⁶Munhu wakarurama anoratidza mumwe wake nzira asi nzira yavakaipa inovatungamirira mutome.

²⁷Anogara maoko hapana nyama yaanobata asi anogwinyisa maoko anowana upfumi hwakakosha.

²⁸Munzira yoururami munoupenyu munzira yomugwagwa iwoyo hamuna rufu.