Read Bhaibhiri Idzva rechiShona Tsumo 13 Bible Online

Tsumo 13 - Bhaibhiri Idzva rechiShona bible

Tsumo 13

¹Mwana akangwara anoteerera zvaanodzidziswa nababa vake, asi tsvuuramuromo haitsiuriki.

²Munhu anodya zvakanaka zvinobva mumuchero wezvaanotaura nomuromo wake asi vanyengedzi chavanoda utsinye.

³Munhu anobata muromo wake anochengetedza upenyu hwake asi anongoshamarara kutaura anozviparadza.

⁴Nyope yomunhu inosuwira zvinhu asi haina chainowana, vanochamirira basa vanokora.

⁵Akarurama anovenga nhema asi akaipa anoita zvinotsverutsa uye zvinonyadzisa.

⁶Ururami hunochengetedza vane nzira dzakarurama asi chitadzo chinorigira pasi mutadzi.

⁷Mumwe munhu anoita somupfumi chaanacho pasina mumwewo anoita zvake somurombo asi aine upfumi hwakawanda.

⁸Chinonunura munhu upenyu upfumi hwake, asi murombo hapana chikonzero chokumutyityidzira.

⁹Chiedza chomururami chinongoti bhaa kuchena asi mwenje womuipi uchanzi nhoo kudzimwa.

¹⁰Kuzvikudza, chako kumutsa nharo asi vanobvuma kupiwa mazano chavo ungwaru.

¹¹Upfumi hunowanikwa nechimbichimbi hautani kupera asi anohuunganidza kashoma nakashoma anotohuwedzeredza.

¹²Chawakatarisira munhu chikanonoka zvinoodza mwoyo asi chaunoda chikaitika ndiwo muti woupenyu.

¹³Munhu anoshora shoko[11] anozviparadza asi anoremekedza mutemo achapiwa mubayiro.

¹⁴Chidzidziso chomungwaru chisipiti cheupenyu kuitira kuti munhu anzvenge musungo werufu.

¹⁵Kunzwisisisa kunoita kuti munhu adiwe asi nzira yavanyengedzi yakaoma.

¹⁶Munhu akachenjera anoita zvinhu noruzivo asi benzi rinoparidzira urema hwaro.

¹⁷Nhumwa yakaipa inopinza munhamo asi nhumwa yakatendeka inounza kurapa.

¹⁸Munhu anoshora dzidzo urombo nokunyadziswa ndozvake asi anoisa mumwoyo zvaanege atsiurwa acharemekedzwa.

¹⁹Munhu anofara kana zvaanoda zvaitika zvokusiana nezvakaipa mapenzi haadi.

²⁰Anofambidzana navangwaru, anovawo mungwaru asi shamwari yamapenzi inopinda nhamo.

²¹Vatadzi vanorondwa nezvakaipa asi vakarurama vanopiwa mubayiro nezvakanaka.

²²Munhu wakanaka anosiira vana vevana vake nhaka asi upfumi hwomuipi hunochengeterwa varurami.

²³Gura romurombo rinopa chokudya chakawanda asi chinotsvairwa pamusana pokushaika kweruenzaniso.

²⁴Munhu asingarove mwana wake neshamhu anomuvenga, asi anoda mwana wake anomuranga kwazvo.

²⁵Mururami anodya pamadiro, asi dumbu rowakaipa inzara yoga.