Read Bhaibhiri Idzva rechiShona Tsumo 14 Bible Online

Tsumo 14 - Bhaibhiri Idzva rechiShona bible

Tsumo 14

¹Ungwaru hunovaka imba yahwo asi upenzi hunozviparadzira imba yahwo.

²Anofamba mukutendeseka anotya Tenzi. Asi munhu woujarijari anoshora Tenzi.

³Kutaura kwebenzi ndiyo shamhu inorirova musana asi zvinotaura vangwaru ndizvo zvinovachengetedza.

⁴Pasina mombe hapanawo mbeswa asi nesimba remombe mbeswa dzinowanda.

⁵Chapupu chakatendeka hachirevi nhema asi chapupu chenhema chinonyepa.

⁶Munyombi angatsvake zvake ungwaru asi hapana chimuko asi munhu anonzwisisa anowana ruzivo nyore.

⁷Siana nebenzi nokuti hapana mashoko oungwaru aunowana pariri.

⁸Kuziva nzira dzake ndihwo ungwaru hwomuchenjeri, asi unyengedzi ndihwo upenzi hwebenzi.

⁹Benzi rinoshora mupiro wokupfupira zvitadzo asi wakarurama anofadzwa nawo.[12]

¹⁰Mwoyo ndiwo unoziva kurwadziwa kwawo, mumwewo munhu haagone kugoverana rufaro nawo.

¹¹Musha womunhu akaipa unoparadzwa asi musasa womunhu akarurama unofambira mberi.

¹²Pane dzimwe nzira dzaunofunga kuti inzira kwadzo asi mugumo wadzo rufu.

¹³Munhu anogona kuseka zvake asi mumwoyo make muino kusuwa panopera kufara-fara kuya, yauya nhamo.

¹⁴Munhu wakaipa achazadzwa nomubayiro wezvaanoita wakanakawo nemichero yezviito zvake.

¹⁵Munhu asina pfungwa dzakadzama anongobvumira zvose zvose asi munhu wakangwara anotarisa paanotsika.

¹⁶Mungwaru anochenjerera zvinhu uye anonzvenga zvakaipa asi benzi rinozviita suku nasai, harikendenge.

¹⁷Munhu anokurumidza kushatirwa zvaanoita ndezvoupenzi asi munhu anoona zvinhu nemazvo anoita mwoyo murefu.

¹⁸Vanhu vasina pfungwa dzakadzama chavo upenzi, vakangwara chavo indaza yoruzivo.

¹⁹Vaipi vanogwadamira vakanaka, ndizvo zvinoita vakaipa pamisuo mikuru yavarurami.

²⁰Varombo havadiwi kunyange nomuvakidzani navo asi mupfumi ane shamwari zhinji.

²¹Munhu anoshora mumwe wake mutadzi, akakomborerwa zvake munhu anoitira varombo tsiye nyoro.

²²Ko havakanganise here vanhu vanoronga kuita zvakaipa? Vanoronga kuita zvakanaka vanowana mwoyochena nokutendeseka.

²³Basa rose rose rine chimuko, asi kungotaura bedzi kunosvitsa pakushaiwa.

²⁴Upfumi[13] indaza yavachenjeri, asi upenzi indaza yamapenzi.

²⁵Chapupu chechokwadi chinoponesa upenyu, asi munhu anoreva nhema mutengesi.

²⁶Mukutya Tenzi mune chivimbo chakasimba, kana vana vakewo vanowana kwokupotera.

²⁷Kutya Tenzi chisipiti choupenyu, kuitira kuti munhu anzvenge misungo yorufu.

²⁸Kuwanda kwavanhu ndiyo mbiri yamambo ishe akashaya vanhu anoparara.

²⁹Munhu asingakurumidzi kushatirwa munhu anonzwisisa, asi anokurumidza kushatirwa, anoita kuti upenzi huwande.

³⁰Pfungwa dzikagadzikana, muviri unoita utano shungu dzomwoyo dzinoodza mapfupa.

³¹Anodzvinyirira murombo zvisina kunaka anoshora musiki wake, asi anoita tsiye nyoro kwaari anoremekedza musiki wake.

³²Munhu wakaipa anoputsirwa pasi nouipi hwake, asi akarurama chitarisiro chake chiri mukuva pachokwadi.[14]

³³Ungwaru hunogara mupfungwa dzomunhu anonzwisisa, asi mumwoyo mebenzi hauzivikanwi.

³⁴Ururami hunosimudzira rudzi asi chitadzo chinoshoresa rudzi.

³⁵Muranda anoita zvino ungwaru anodiwa namambo asi anoita zvinonyadzisa anomuvirukira nehasha.