Read Bhaibhiri Idzva rechiShona Tsumo 15 Bible Online

Tsumo 15 - Bhaibhiri Idzva rechiShona bible

Tsumo 15

¹Mhinduro nyoro inopodza hasha, asi izwi rakaomarara rinovirutsa hasha.

²Rurimi rwavangwaru runoparadzira ruzivo, asi muromo wamapenzi unowodzvora urema.

³Ziso raTenzi riri pose pose, rakatarisa vakanaka navakaipa.

⁴Rurimi rwakareruka muti woupenyu asi rurimi rwakaipa runoodza mwoyo.

⁵Benzi rinoshora chidzidziso chababa varo asi anoteerera zano raanorairwa akangwara.

⁶Mumusha momururami mune upfumi hwakawanda, asi upfumi hwomuipi hunopinda pfumvu.

⁷Muromo wavangwaru unoparadzira ruzivo asi pfungwa dzemapenzi hadzidaro.

⁸Chibayiro chavaipi chinosemesa Tenzi, asi munamato wavarurami unomufadza.

⁹Tenzi anovenga nzira yomuipi. Asi anoda munhu anotevedza ururami.

¹⁰Kumunhu anotsauka panzira kudzidziswa[15] kwakamuipira, munhu asingadi kutsiurwa anofa.

¹¹Nzvimbo yavafi nenzvimbo yokuparadzwa dziri pachena-chena kuna Tenzi ko kutozoti mwoyo yavanhu.

¹²Anodada haadi kutsiurwa, haaendi kuvangwaru.

¹³Kana mwoyo womunhu wakafara unoita kuti munhu ave nechiso chakafara mwoyo ukasuruvara mweya unobva wati mbombombo pasi.

¹⁴Munhu ane pfungwa dzinonzwisisa anotsvaka ruzivo asi muromo wamapenzi upenzi ndihwo chokudya chawo.

¹⁵Kumurombo mazuva ose akaipa, asi kumwoyo wakafara zuva roga roga mabiko makuru.

¹⁶Zviri nani kuva munhu ane zvishoma uchitya Tenzi pano kuva noupfumi huzhinji uine nhamo.

¹⁷Zviri nani kudya nomurio pane rudo pane kudya nenyama yechimhuru chakakora pano ruvengo.

¹⁸Munhu wehasha anomutsa muchokoto asi ano mwoyo murefu anopodza gakava.

¹⁹Nzira yetsimbe yakaita seruzhowa rweminzwa asi nzira yomururami yakati tasa somugwagwa mukuru wakati sandara.

²⁰Mwana mukomana anoungwaru anoita kuti baba vake vafare asi benzi romunhu rinoshora amai.

²¹Upenzi hunofadza munhu asina pfungwa asi munhu anonzwisisa anofamba zvakarurama.

²²Zvirongwa hazvibudirire kana pasina vokupa mazano asi navapi vemazano vakawanda zvinobudirira.

²³Kupa mhinduro yakanaka chinhu chinofadza kumunhu ko kutozoti izwi rinotaurwa panguva yaro yakanaka.

²⁴Nzira youpenyu yavakangwara inoenda kumusoro kuti vanzvenge nzvimbo yavafi iri kwakadzika.

²⁵Mwari anopaza dzimba dzavanozvikudza asi anochengetedza miganhu yechirikadzi.

²⁶Pfungwa dzavaipi Tenzi anodzivenga. Mazwi avatsvene anomufadza.

²⁷Munhu anokarira kuwana upfumi nenzira isina kururama anoparira mhuri yake nhamo asi anovenga pfumbamuromo anorarama.

²⁸Munhu akarurama anombofunga mumwoyo make zvokupindura asi muromo wavakaipa unongosasa zvakaipa.

²⁹Tenzi ari kure navakaipa asi anonzwa munamato wavakarurama.

³⁰Meso ano rufaro anofadza mwoyo shoko rakanaka rinosimbisisa munhu mapfupa.

³¹Munhu anoteera zvaanotsiurwa anogara pakati pavangwaru.

³²Munhu asingadi kudzorwa anozvishora iye pachake asi munhu anotsiurika anowana kunzwisisa.

³³Kutya Tenzi chidzidzo choungwaru kuti munhu ukudzwe tanga wazvirereka.