Read Bhaibhiri Idzva rechiShona Tsumo 16 Bible Online

Tsumo 16 - Bhaibhiri Idzva rechiShona bible

Tsumo 16

¹Munhu anogona kuronga zvinhu mumwoyo make asi zvaanozotaura norurimi rwake zvinenge zvatobvumidzwa naTenzi.

²Zviito zvomunhu zvingatarisike sezvakanaka kumuridzi wazvo asi Tenzi anoyera zvinangwa zvomunhu.

³Turira basa rako kuna Tenzi zvirongwa zvako zvinobudirira.

⁴Tenzi anebasa raakasikira chimwe nechimwe kunyange vakaipa vane zuva ravo repfumvu.

⁵Munhu wose anozvitutumadza, Tenzi anomusema kurangwa haambofa[16] akapotsana nako.

⁶Mwoyo wakanaka nokutendeseka zvinopfupira zvitadzo kutya Tenzi kunoita kuti munhu anzvenge uipi.

⁷Kana Tenzi afadzwa noupenyu hwomunhu anosandura vavengi vake achivaita shamwari dzake.

⁸Zviri nani kuva nezvishoma munhu ari mururami pane kuva nezvakawanda asi pasina ruenzaniso.

⁹Munhu anogona kuzvirongera zvaanoda kuita asi Tenzi ndiye anototungamirira kufamba kwake.

¹⁰Mambo anotaura seane kamuti mukanwa, kana wotonga haapotsi.

¹¹Zviero nezvikero zvakarurama ndezvaTenzi kunyange zvokueresa zviri mutsapo ndezvake.

¹²Kuita zvakaipa kunosemesa kumadzimambo nokuti umambo hunotsigirwa noururami.

¹³Muromo unotaura zvakarurama unofadza mambo uye anoda munhu anotaura zvakarurama.

¹⁴Hasha dzamambo iyambiro yorufu, munhu akangwara anoedza kudzipodza.

¹⁵Kufaranuka uso kwamambo kunoreva upenyu kufarirwa namambo kwakaita samakore anounza mvura yomunhuruka.

¹⁶Kuwana ungwaru, kuri nani pano kuwana ndarama, kuva nokunzwisisa ndiko kunofanira kusarudzwa pane kusarudza sirivha.

¹⁷Mugwagwa mukuru wavarurami unotsaukana nouipi. Munhu anotarisa paanotsika anozvichengetedza upenyu.

¹⁸Kuzvikudza kunoteverwa nokuparadzwa uye kuviruka nehasha kunoteverwa nokukoromoka.

¹⁹Zviri nani kuva nomwoyo wokuzvirereka pamwechete navarombo pano kugoverana zvokupamba pamwechete navanozvikudza.

²⁰Munhu anoteerera shoko anobudirira akakomborerwa anovimba naTenzi.

²¹Munhu akangwara anonzi munhu anoona zvinhu nemazvo, kutaura zvinotapira kunobatsira kukurudzira vamwe.

²²Ungwaru itsime roupenyu kune anaho asi upenzi ishamhu kumapenzi.

²³Pfungwa dzomungwaru dzinoita kuti muromo wake utaure zvinoungwaru uye zvinopamhidzira kumuromo wake chipo chokukurudzira vamwe.

²⁴Mazwi akanaka akaita sezinga rouchi, anotapira parurimi uye anorapa munhu.

²⁵Munhu anogona kuona zviito zvake sezvakanaka asi zvichizoguma zvamuendesa kurufu.

²⁶Havi yomushandi ndiyo inomumanikidza kushanda nokuti nzara inomukweva.

²⁷Dzenga rinomutsa muchokoto, zvarinotaura, moto chaiwo unopisa.

²⁸Munhu akaipa anopesanisa vanhu munhu wamakuhwa anoparadzanisa shamwari.

²⁹Munhu woutsinye anofurira mumwe wake achimutungamirira munzira isina kururama.

³⁰Munhu anochonya maziso ane twaanoronga twakaipa, munhu anomonya muromo anokonzera zvakaipa kuti zviitike.

³¹Kuchena musoro indaza yembiri kunowanikwa noupenyu hwakarurama.

³²Munhu asingakurumidzi kushatirwa ari nani pane vana masimba, munhu anozvitonga ari nani pane anokurira guta.

³³Panogona zvapo kuita chin'ange pamakumbo asi zvinenge zvabvumirwa naTenzi ndizvo zvinoitika.