Read Bhaibhiri Idzva rechiShona Tsumo 17 Bible Online

Tsumo 17 - Bhaibhiri Idzva rechiShona bible

Tsumo 17

¹Zviri nani kuva nechipapata norunyararo pano mumba muzere nokudyiririra asi muine gakava.

²Muranda mungwaru anotonga mwana mukomana anoita zvinonyadzisa uye anotogoverana nhaka semukomanomun'una nevana vomo.

³Bisiro nderesirivha virira nderendarama asi Tenzi ndiye anoedza mwoyo.

⁴Muiti wezvakaipa anoteerera kumuromo unoreva nhema munyepi anoteerera makuhwa.

⁵Munhu anonyomba murombo anonyomba musiki wake. Munhu anofarira nhamo dzavamwe haamborega kurangwa.

⁶Vazukuru ndivo ndaza yavakwegura uye vabereki ndiyo mbiri yavana.

⁷Kutaura zvakanaka hakupindirani nebenzi ko kutozoti jinda rinotaura nhema.

⁸Pfumbamuromo kumuridzi wayo yakaita sedombo romushonga kwose kwaanoenda anobudirira.

⁹Munhu anoregerera anotsvaka rudo asi anoramba odzokorora nyaya anoputsa ukama.

¹⁰Kutsiurwa kunopinda mumunhu anonzwisisa kupfuura kurova benzi kazana.

¹¹Munhu wakaipa anotsvaka zvokupanduka achatumirwa nhumwa inoutsinye.

¹²Zviri nani kuti munhu asangane zvake nebere gadzi ratorerwa vana varo pane kusangana nebenzi muupenzi hwaro.

¹³Munhu akatsiva chakanaka nechakaipa, zvakaipa hazvizosiana neimba yake.

¹⁴Kutangisa kwegakava kwakaita sokudziura mvura saka ibva gakava risati ramuka.

¹⁵Munhu anopembedza munhu akaipa nomunhu anopa mhosva munhu asina mhosva vose vari vaviri vanosemesa pana Tenzi.

¹⁶Zvinobatsirei benzi kuva nemari mumaoko yokutenga nayo ungwaru iro musoro risina.

¹⁷Shamwari ishamwari nguva dzose asi womumba ndowokutakura naye nhamo.

¹⁸Munhu asina pfungwa anongotsidza achiva munhu wokumiririra chikwereti chomumwe.

¹⁹Munhu anoda kukanganisa anoda mhirizhonga. Munhu anoda kuzvikwiridzira pamusoro anozvitsvakira kuparadzwa.

²⁰Munhu woujarijari haabudiriri uye munhu anotaura zvakatsveyama anowira mumatambudziko.

²¹Munhu anobereka dununu romwana ane nhamo. Baba vebenzi havana mufaro.

²²Kuva nomwoyo wakafaranuka mushonga wakanaka kusuruvara mwoyo kunoonza munhu.

²³Munhu wakaipa anotora pfumbamuromo pachipfuva chake kuti akanganise ruenzaniso.

²⁴Munhu anonzwisisa ungwaru anogara akatarisana naho asi maziso ebenzi anogara ari kokoko kwakaperera nyika.

²⁵Benzi romwana rinorwadzisa mwoyo wababa uye rinoshungurudza amai vakaribereka.

²⁶Kuripisa munhu asina mhaka hazvina kunaka. Kurova vakuru vakuru neshamhu hakuna kunaka.

²⁷Munhu anozvidzora pakutaura anoruzivo munhu akanyarara munhu anonzwisisa.

²⁸Kunyange benzi rinonyarara rinoonekwa somungwaru. Kana akaramba akati zvake muromo bo vanhu vanofunga kuti anonzwisisa.