Read Bhaibhiri Idzva rechiShona Tsumo 18 Bible Online

Tsumo 18 - Bhaibhiri Idzva rechiShona bible

Tsumo 18

¹Zindoga anotsvaka zvaanoda iye anoshatiriswa namazano kwawo ose.

²Benzi harinei nokunzwisisa charo kuda chete kutaura zvarinoda.

³Kana uipi hwouya, zvinobva zvateverana nokuzvidzwa kushorwa kunouya pamwechete nokufumurwa.

⁴Mazwi anotaurwa nomunhu imvura yakadzika, karwizi kanoyerera, kasipiti koungwaru.

⁵Hazvina kunaka kuitira wakaipa zvakanaka uchitadzisa ruenzaniso kuna wakarurama.

⁶Muromo webenzi unomutsa gakava zvarinotaura zvinoridaidzira shamhu.

⁷Zvinobva mukanwa mebenzi zvinomuparadza, muromo wake musungo unosunga iye.

⁸Mazwi omunhu anotaura makuhwa anenge misuva inonaka anonyatsoti dyoo mukatikati momuviri.

⁹Munhu anoita nungo pabasa mukoma nomunun'una nemharadzi.

¹⁰Zita raTenzi inhare yakasimba mururami anomhanyira mariri anochengeteka.

¹¹Upfumi hwomupfumi inhare yake yakasimba anotofunga kuti rusvingo rusingakwiriki.

¹²Munhu asati aparadzwa anombozvikudza kuti munhu ukudzwe tanga wazvidukupisa.

¹³Kupa mhinduro usina kunzwa mubvunzo wacho, hurema uye zvinonyadzisa.

¹⁴Nomwoyo mukuru unogona kutirira chirwere asi ukarasa mwoyo ungatirire sei.

¹⁵Munhu ano musoro anozviwanira ruzivo nzeve yomungwaru inotsvaka ruzivo.

¹⁶Chipo chinokuzarurira mikova yakawanda chichikuwanisa masvikiro pana vakuru vakuru.

¹⁷Anotanga kupira nyaya yake ndiye anoonekwa seari pachokwadi. Kusvikira mumwe wake auya kuzomuongorora.

¹⁸Chin'ange chinopedza gakava chinopedza kukwikwidzana kwavane simba, vanoitirana mapitse.

¹⁹Mukoma kana munun'una ashatiriswa anotyisa kupinda nhare yokuzvidzivirira nayo muhondo. Gakava rakadaro rakaita sezvihuri zvenhare yokuzvidzivirira nayo muhondo.

²⁰Zvaunotaura ndizvo zvinozokuzvimbira, zvinobva pamuromo pako ndizvo zvinozokutsitsirira.

²¹Rufu noupenyu zviri mumaoko orurimi vanoita ushamwari narwo vanowana mubayiro warwo.

²²Munhu anowana mukadzi anowana chinhu chakanaka chinotova chiratidzo chorudo rwaTenzi.

²³Varombo vanotoita zvokuteterera asi vapfumi vanopindura nehasha.

²⁴Dzimwe shamwari ndedzokuvaraidza chete asi imwe shamwari inokunda mukoma kana munun'una.