Read Bhaibhiri Idzva rechiShona Tsumo 19 Bible Online

Tsumo 19 - Bhaibhiri Idzva rechiShona bible

Tsumo 19

¹Zviri nani kuva murombo anogara upenyu hwakarurama pano huyakose yomunhu benzi.

²Hazvina kunaka kuti munhu ashaye ruzivo. Anokurumidza kumedza kutsenga achakuda, anorasika.

³Kana upenzi hwomunhu hwamusvitsa pakuparadzwa, mwoyo wake unovirukira Tenzi nehasha.

⁴Upfumi hunokuwanira shamwari itsva asi murombo anofuratirwa neshamwari yake.

⁵Chapupu chenhema hachirege kurangwa anonyepa haapunyuki.

⁶Vanhu vazhinji vanoda kufadza mukuru-mukuru munhu wose anoda kushamwaridzana nomunhu anopa.

⁷Murombo anovengwa nehama dzake dzose, ko kutozoti shamwari, dzinomirira kure zvakadii? Angasarudze zvake mazwi ake asi hapana waanosara anaye.

⁸Munhu anozviwanira ungwaru munhu anozvida. Munhu anochengetedza kunzwisisa anobudirira.

⁹Chapupu chenhema hachirege kurangwa munhu anonyepa achaparara.

¹⁰Hazvikodzeri kuti benzi rigare pamutambaratede, zvakatonyanya kusakodzera kuti muranda atonge vakuru vakuru.

¹¹Munhu anonzwisisa haakurumidzi kushatirwa kuregerera kunoita kuti aremekedzwe.

¹²Hasha dzamambo dzakafanana nokudzvova kweshumba asi ushamwari naye hwakaita sedova pauswa.

¹³Benzi romwana imharadzi kuna baba vake. Mudzimai ano pamuromo mumba imba inoramba ichidonha.

¹⁴Imba noupfumi inhaka inobva kumadzibaba asi mukadzi mungwaru anobva kuna Tenzi.

¹⁵Nungo dzinopfodoresa munhu hope, nyope yomunhu inofa nenzara.

¹⁶Munhu anochengeta mutemo anozvichengeta upenyu asi anoshora nzira dzaTenzi anofa.

¹⁷Munhu anoita mwoyochena kumurombo, anokweretesa kuna Tenzi, anomuripa zvaanenge aita zvacho.

¹⁸Raira mwana wako achiri kunzwa asi kwete zvokutoda kumuuraya.

¹⁹Munhu ane hasha dzakawanda achawana mubayiro wadzo nokuti ukamurandutsira uchatozomurandutsirazve.

²⁰Teerera zano raunopiwa ugamuchire kudzidziswa kwaunoitwa kuti uwane ungwaru muneramangwana.

²¹Munhu anogona kuzvirongera, mumusoro make, zvinhu zvakawanda asi zvinodiwa naTenzi ndizvo zvinozoitika.

²²Chinodiwa pamunhu kuvimbika, murombo ari nani pano murevi wenhema.

²³Kutya Tenzi kunosvitsa kuupenyu uye anako anogadzana mwoyo, hapana chinomuwana.

²⁴Nyanungo anoti ruoko mundiro tindindi agoita nungo dzokurudzorera kumuromo.

²⁵Rova tsvuuramuromo dununu rinodzidza ungwaru, ukatsiura munhu anonzwisisa anowana ruzivo.

²⁶Mwana anorova baba achitandanisa amai vake, mwana anonyadzisa uye anoshoresa.

²⁷Mwanangu kana uchida kurasika pamashoko oruzivo kanda pasi zvidzidziso.

²⁸Chapupu chinoreva nhema chinoshora ruenzaniso muromo womuipi unokambura uipi.

²⁹Chirango chakamirira vanoshora, shamhu yakamirira misana yamapenzi.