Read Bhaibhiri Idzva rechiShona Tsumo 20 Bible Online

Tsumo 20 - Bhaibhiri Idzva rechiShona bible

Tsumo 20

¹Waini munyombi hwahwa mupopoti anoteteretswa nazvo haana kungwara.

²Hasha dzamambo dzinotyisa dzakaita sokudzvova kweshumba, anomutsa hasha dzake, anorasikirwa noupenyu hwake.

³Kunzvenga gakava chinhu chinoremekedzwa asi benzi riri rose, pane gakava, ndoparakadanwa rikadavira.

⁴Tsimbe hairime pakurima, pakukohwa inondotsvaka asi hapana chainowana.

⁵Zvirongwa zvepfungwa dzomunhu zvakaita semvura yakadzika asi anonzwisisa ndiye anoiteka.

⁶Vanhu vazhinji vanoparidzira kutendeka kwavo asi akatendeka chaiye ndiani angamuwane?

⁷Vakakomborerwa zvavo vana vomururami anofamba pachokwadi.

⁸Mambo anogara pachigaro chokutonga anopepeta zvakaipa namaziso ake.

⁹Ndiani angati ndine mwoyo wakachena handina mhosva yechitadzo.

¹⁰Kuita nezvikero zvakasiyana-siyana[17] uye nezvipimiso zvakasiyana-siyana zvinosemesa kuna Tenzi.

¹¹Kunyange mwana, anoita kuti vanhu vamuzive nezviito zvake zvingave zvakanaka kana zviri pachokwadi.[18]

¹²Maziso anoona nenzeve dzinonzwa zvose zviri zviviri zvakaitwa naTenzi.

¹³Usaite ushamwari nehope urombo hunova hwako. Svinura maziso ako kuguta sadza kuchava kwako.

¹⁴Munhu anotenga anoti chakaipa, chakaipa asi akangobvapo avakuzvirova dundundu.

¹⁵Kune ndarama namatombo anokosha akawanda asi miromo yeruzivo chishongo chinokosha.

¹⁶Munhu anomirira chikwereti chomunhu waasingazivi ngaatorerwe hanzu yake ive chitsidzo chokumiririra kwake chikwereti chomunhu waasingazivi.

¹⁷Chingwa chokuba chinonaka asi mushure chinopinduka kuita somunhu ane jecha mukanwa.

¹⁸Mazano marairanwa, kurwa hondo hunge matombogara pasi maronga.

¹⁹Munhu asingagare pasi namakuhwa anoburitsa zvakavandika saka usashamwaridzane nazimwaya anorotomoka kutaura.

²⁰Munhu anorengerera baba naamai rushambwa mwenje wake uchadzima muzarima.

²¹Nhaka yaunowana chimbichimbi haina chikomborero pakupedzisira.

²²Usati ndinoda kudzorera chakaipa vimba naTenzi achakubatsira.

²³Ujarijari nezvikero hunosemesa kuna Tenzi zvokueresa zvokubiridzira nazvo hazvina kunaka.

²⁴Tenzi ndiye anotungamirira munhu pakufamba kwake ko munhu angazive sei kuchaenda upenyu hwake.

²⁵Zvine njodzi kumunhu kukurumidza kupira chinhu kunaMwari mushure ndopowozofunga kuti zvino ndaitei.

²⁶Mambo akangwara anopepeta vakaipa agovapura nemhuro.

²⁷Mweya womunhu ndiwo mwenje waTenzi unovheneka mukati momuviri wake.

²⁸Mwoyochena, nokutendeseka ndizvo zvinochengetedza mambo. Chigaro chake chinochengetedzwa nemwoyochena.

²⁹Mbiri yamajaya iri musimba ravanaro kuremekedzwa kwavakwegura kuri mukuchena musoro.

³⁰Maronda okurikitwa anosuka uipi shamhu dzinosuka mukatikati momunhu.