Read Bhaibhiri Idzva rechiShona Tsumo 21 Bible Online

Tsumo 21 - Bhaibhiri Idzva rechiShona bible

Tsumo 21

¹Mwoyo wamambo uri mumaoko aTenzi, anoutendeutsira kwaanenge achida.

²Zviito zvose zvomunhu zvingatarisike sezvakanaka kumuridzi wazvo, asi Tenzi anoyera zvinangwa zvomunhu.

³Kuita zvakarurama noruenzaniso, ndizvo zvinodiwa naTenzi kupinda chibayiro.

⁴Kutsvitsvinyara uye kuva nemwoyo wokuzvikudza chitadzo, ndiwo mwenje wavakaipa iwoyo.

⁵Kunyatsoronga zvinhu nemazvo, kunowanisa zvakawanda, mandichimbidzike anobereka urombo.

⁶Kuwana upfumi namanyepo ibute rinongopfuura uye iriva rorufu.

⁷Utsinye hwavakaipa huchavakukura nokuti vanoramba kuita zvino ruenzaniso.

⁸Maitiro omunhu ane mhosva akaminama, asi evasina mhosva akati tasa.

⁹Zviri nani kugara pakona[19] yedenga remba pano kugara nomukadzi anenharo.

¹⁰Mwoyo womunhu akaipa, unodokwairira uipi haana tsiye nyoro nomunhu.

¹¹Kana anoshora akarangwa voruzhinji vanongwara. Kana mungwaru akadzidziswa, anowana ruzivo.

¹²Iye mururami anoongorora imba yomuipi achapinza vakaipa mukuparadzwa.

¹³Munhu anodzivira nzeve kumurombo anochema kwaari, iyewo achazochema pasina anomunzwa.

¹⁴Chipo chinopiwa muchivande chinopodza hasha. Pfumbamuromo yapakavanda inomutsa hasha dzinotyisa.

¹⁵Kana ruenzaniso rwaitwa zvinofadza wakarurama asi zvinokangaidza vakaipa.

¹⁶Munhu anodzungaira achisiya nzira yokunzwisisa achandozorora mugungano rakafa.

¹⁷Munhu anoda zvokunakirwa anova murombo, munhu anoda waini namafuta haambopfuma.

¹⁸Muipi ndiye achava chokununurisa mururami vasingatendi muna Mwari vachava chokununurisa vari pachokwadi.

¹⁹Zviri nani kugara mugwenga pano kugara nomukadzi anenharo uye ane muromo.

²⁰Pfuma inokosha namafuta zvinowanika mumba momungwaru asi benzi romunhu rinozviparadza.

²¹Munhu anoramba achiita zvakarurama nemwoyochena achawana upenyu, noururami nokukudzwa.

²²Mungwaru anogona kukwira paguta ravarwi vakasimba agowisira pasi guta rokuzvidzivirira muhondo ravaivimba naro.

²³Munhu anobata muromo wake uye anochengetedza rurimi rwake anonzvenga nhamo.

²⁴Mushori ndiro zita romunhu anozvikudza anozvitutumadza anoita zvehasha achizvikudza.

²⁵Munhu ano usimbe, chinomuuraya ishungu nokuti maoko ake haadi kushanda.

²⁶Muipi anoswera muswere wose achingodokwaira zvokudokwaira zviye asi mururami anopa asingaiti kanyimiramundiro.

²⁷Chibayiro chavaipi chinosemesa, ko kutozoti kana zvaanochiunzira zviri zvakaipa.

²⁸Chapupu chenhema chinoparara asi chapupu chakazvinzwa chinoramba chichiteererwa

²⁹Munhu wakaipa ane chiso chisinganyari asi akarurama akatsiga mukuita kwake.

³⁰Hakuna ungwaru kana njere kana mazano zvingamirisane naTenzi.

³¹Bhiza ringadziirirwa zvaro zuva rehondo asi anonunura muhondo ndiTenzi.