Read Bhaibhiri Idzva rechiShona Tsumo 22 Bible Online

Tsumo 22 - Bhaibhiri Idzva rechiShona bible

Tsumo 22

¹Zviri nani kuva nezita rakanaka pane kuva noupfumi hwakawanda kuremekedzwa kuri nani pane sirivha kana ndarama.

²Chavanofanana vapfumi navarombo chimwechete chokuti Tenzi ndiye musiki wavo vose.

³Wakachenjera anoona njonzi ovanda akapusa anoenderera mberi asi anowona mubayiro wake.

⁴Mubayiro wokuzvirereka nowokutya Tenzi upfumi nokuremekedzwa noupenyu.

⁵Munzira yomunhu asina kutsarukana mune minzwa nemisungo munhu anozvichengeta anogara kure nazvo.

⁶Dzidzisa mwana nzira yaanofanira kufamba nayo kunyange akura haasiane nayo.

⁷Vapfumi ndivo vanotonga varombo, mukwereti muranda womukweretesi.

⁸Munhu anodyara zvisina ruenzaniso achakohwa matambudziko shamhu yokushatirwa kwake ichamuperera.

⁹Munhu ane ruoko rwunopa akakomborerwa nokuti anogoverana chokudya chake navarombo.

¹⁰Ukadzinga mushori gakava rinobva raenda uye nharo nokutuka zvinobva zvapera.

¹¹Munhu ano mwoyo mutsvene ane rurimi runotapira anova shamwari yamambo.

¹²Tenzi anoona kuti chokwadi chachengetedzwa asi mashoko avanonyepa anoaparadza.

¹³Nyope inoti, “Panze apa pane shumba! Ndingangouraiwa mumugwagwa, wehama!”

¹⁴Muromo wepfambi igomba rakadzama anoshatirirwa naTenzi anowira mariri.

¹⁵Mwana anoberekwa ane upenzi mumwoyo asi shamhu ndiyo inohudzinga maari.

¹⁶Munhu anodzvinyirira varombo zvakaipa achida kuwanza upfumi hwake achipa zvipo kuvapfumi achapinda urombo.

¹⁷Rerekera nzeve yako unzwe mazwi avangwaru uise mwoyo wako mune zvandinokuzivisa.

¹⁸Zvichakunakira ukazvichengeta mauri zviri pamuromo pako zvose.

¹⁹Kuitira kuti uvimbe naTenzi, ndada kukuzivisa izvi iyewe nhasi uno.

²⁰Ndakakunyorera makumi matatu etsumo dzokukupa mazano noruzivo handiti?

²¹Izvi kuitira kuti ndikuratidze zvakarurama nezvechokwadi kuitira kuti upe anenge akutuma mhinduro yechokwadi.

²²Usapambe murombo nokuti murombo, usambunyikidze vatamburi padare,

²³nokuti Tenzi achavarwira, achatorera upenyu vanovapamba.

²⁴Usaite ushamwari nomunhu wehasha kana kufambidzana nemunhu wokutsamwa

²⁵ungadaro ukadzidza tsika dzake zvikave musungo unokusunga.

²⁶Usave mumwe wavanoita chitsidzo anova mumiririri wezvikwereti.

²⁷Kana usina chokuripa nacho vangadaro vakatora mubhedha wako waunorara.

²⁸Usabvise chitata chakare chomuganhu wenyika chakaiswa namadzibaba ako.

²⁹Ndiratidzei munhu anoziva basa rake iyeyo ndiye achamira pamberi pamadzimambo haamiri pamberi pavanhu vasingazivikanwi.