Read Bhaibhiri Idzva rechiShona Tsumo 23 Bible Online

Tsumo 23 - Bhaibhiri Idzva rechiShona bible

Tsumo 23

¹Kana wagara pakudya nomutongi ziva kuti ndiani ari pamberi pako

²uzvibate kana uri munhu anokara kudya.

³Usaite makaro namachikichori ake nokuti ndookuti akuone zvauri.

⁴Usazviuraye nebasa kuti uwane upfumi iva noungwaru wombozororawo

⁵nokuti unongohuti onei ndizvozvo ihwo waru waru hutu hwaenda huchibhururuka kudenga segondo.

⁶Usadye chokudya chomunhu anonyima, usadokwairire machikichori ake

⁷nokuti iye mumwoyo rinenge riri bishi kufunga uku achiti idya idya zvako asi iye asingambozvirevi nomwoyo wose.

⁸Ucharutsa misuva yaunenge wadya kumukudza kwako kunobva kwashaya maturo.

⁹Usapedze nguva uchitaura nebenzi nokuti richashora basa rezvaunotaura.

¹⁰Usabvise chitata chomuganhu chakare kana kupinda muminda yenherera

¹¹nokuti mununuri wavo ane simba achavarwira achikurwisa.

¹²Isa mwoyo wako mukudzidza urerekere nzeve yako kumazwi oungwaru.

¹³Usarege kuranga mwana, ukamurova neshamhu haambofa.

¹⁴Ukamurova neshamhu unomununura kuenda kunzvimbo yavakafa.

¹⁵Mwanangu kana wakangwara mukati mako'mu mwoyo wanguwo unofara.

¹⁶Ini ndinobva ndafara mumwoyo kana muromo wako uchitaura zvakarurama.

¹⁷Usave neshanje navatadzi mumwoyo mako asi itya Tenzi zuva rose.

¹⁸Pakadaro une ramangwana, chitarisiro chako hachizoganurwa.

¹⁹Teerera mwanangu, iva munhu akangwara ururamise mwoyo wako mugwara.

²⁰Usaite ushamwari nezviradza zvewaini kana kuva navanokara nyama

²¹nokuti chidhakwa neanokara kudya vachava varombo, vanotsomwaira nehope vachapfeka mamvemve.

²²Teerera baba vako vakakubereka uye usashore amai vako kana vakwegura.

²³Tenga chokwadi asi usachitengese tenga ungwaru nedzidziso nokunzwisisa.

²⁴Baba womururami achafara zvisina akamboona. Anobereka mwana mungwaru achafadzwa naye.

²⁵Rega baba vako naamai vako vafare. Rega wakakubereka afare.

²⁶Mwanangu isa mwoyo wako kwandiri maziso ako aongorore zvandinoita.

²⁷Pfambi igomba rakadzika, mukadzi asina kwake, itsime rakamanikana.

²⁸Anogarira segororo achirasisa varume vakawanda.

²⁹Ndiani chaizvo ane jambwa? Ndiani munhu wenhamo? Ndiani wokushupika? Ndiani anopopota? Ndiani ane mavanga aasingazivi kwaakabva nako? Ndiani anotsvukisa maziso?

³⁰Ndavana mubvadzasukwa vane kamwoyo kokuda kuravira waini yakaitwa mvenge.

³¹Usatorwe mwoyo nokutsvuka kwewaini painenge yobwaira mukomichi ichinyatsoti yerere mugurokuro.

³²Pakupedzisira inoruma senyoka igoti ndure kuruma sechiva.

³³Maziso ako achaona zvinhu zvisingazivikanwi. Mumwoyo mako muchabuda zvisakarurama.

³⁴Uchaita somunhu akarara pakati pegungwa kana kurara pamusoro pembambo.

³⁵Uchati, “Vakandirova asi handina kukuvara vakandirakasha kurova asi handina kuzvinzwa ndichamuka rinhi ndinoda kutonwazve.”