Read Bhaibhiri Idzva rechiShona Tsumo 24 Bible Online

Tsumo 24 - Bhaibhiri Idzva rechiShona bible

Tsumo 24

¹Usaitire shanje vanhu vakaipa kana kuda kushamwaridzana navo,

²nokuti mwoyo yavo inofunga zvoutsinye miromo yavo inotaura zvoumharadzi.

³Musha unovakwa noungwaru asi kunzwisisa ndiko kunomisa musha.

⁴Zvakakosha uye zvakanaka zvinozara mudzimba dzawo zvinobva kuruzivo.

⁵Mungwaru anokunda munhu ane simba uye munhu ano ruzivo anokunda ana masimba.

⁶Kuronga ndiko kunopa vanhu kukunda muhondo kukunda kunobva mukunyatsoronga.

⁷Kubenzi, ungwaru huri pamusorosoro padare harimboti muromo bufu.

⁸Munhu anoronga kuita zvakaipa anozonzi womusikanzwa.

⁹Kuronga kuita zvakaipa, chitadzo mushori anosemesa kuvanhu.

¹⁰Ukaora mwoyo pamusi wenhamo simba rako rinobva raita shoma.

¹¹Nunura vanenge vachindundurutsirwa kurufu umise vanenge vachidzadzarikira kundourayiwa.

¹²Kana ukati, “Hatina kumbozviziva.” Ko iye anoona mwoyo haazvione here? Ko iye anokuchengeta haazvizivi here? Haape mumwe nomumwe maererano nezviito zvake here?

¹³Mwanangu idya uchi nokuti hwakanaka musvi weuchi unotapira kuhudya.

¹⁴Ziva kuti ungwaru hwakaita sei kwauri, ukahuhwana une upenyu mune ramangwana chitarisiro chako hachiparare.

¹⁵Usavandire pamba pomururami sezvinoita muipi usaparadze musha wake

¹⁶nokuti akarurama anoputsika kanomwe achimukazve asi akaipa anokundwa nenhamo.

¹⁷Usati Tsvatuwaro kana muvengi wako awira munhamo mwoyo wako ngaurege kufara kana adzadzarika.

¹⁸Tenzi angadaro akazviona akatsamwa nazvo akadzora hasha dzake kwaari.

¹⁹Usazvinetse nezvevaiti vezvakaipa uye usaitire vakaipa shanje.

²⁰Muipi haana upenyu muneramangwana, mwenje wavaipi uchadzimwa.

²¹Mwanangu itya Tenzi namambo usaite rimwe navapanduki[20]

²²nokuti vachawirwa nejambwa nenguva isipi richibva kuna vose vari vaviri.

²³Dzino idzi dzimwe tsumo dzinobva kuvangwaru: Kutonga norusaruro hakuna kunaka.

²⁴Anoti kumuipi hauna mhosva acharengererwa rushambwa navanhu agovengwa namarudzi

²⁵asi vanotsiura vakaipa vachafara vachava nechikomborero chakanaka.

²⁶Kutaura chokwadi hakuputsi ukama.

²⁷Tanga wagadzira zvokunze'ku zvigadzirirewo munda wako ndokuzovaka musha wako.

²⁸Usave chapupu chokuroverera mumwe wako pasina mhosva usanyengedze nomuromo wako.

²⁹Usati kumunhu ndinoda kumuitira sezvaakandiitirawo ndichinotsivawo zvaakandiitira.

³⁰Ndapfuura nepamunda wenyope napamunda webenzi wemugirepisi.

³¹Wonei wakati ndu neminzwa pasi pakazara norukato. Rusvingo rwawo rwakanga rwakapazika

³²Ndakaona ndikarangarira ndakatarisa ndikawona chidzidzo.

³³Kuti regai ndimboti kotsirei kashoma regai ndimboti tsomwairei kashoma ndimboti maoko gumbatei kuzorora zvangu

³⁴urombo hunobva hwati pauri tutururu segandanga uye kushaiwa kunouya kwauri somunhu akapakata zvombo zvokurwa.