Read Bhaibhiri Idzva rechiShona Tsumo 25 Bible Online

Tsumo 25 - Bhaibhiri Idzva rechiShona bible

Tsumo 25

¹Idziwo itsumo dzaSaromoni dzakanyorwa navanhu vokwaEzekiya mambo wokwaJudha.

²Kuna Mwari kuhwandisa zvinhu inotova mbiri kwaaari asi mbiri yamadzimambo, iri mukutsvakisisa zvinhu.

³Sokukwira, kwakaita denga nokudzika kwakaita nyika ndizvo zvakaita pfungwa dzamadzimambo, hadzibatiki.

⁴Ukabvisa tsvina musirivha mhizha youtare inobva yava nechokuitisa midziyo.

⁵Ukabvisa vakaipa panaMambo umambo hwake hunobva hwasimba nohururami.

⁶Usazvisesekedze pana mambo kana kutora nzvimbo yavakuru-vakuru.

⁷Zviri nani kutaurirwa kuti, “Kwira kuno uku” pano kuzoiswa panzvimbo yapasi kana pava negurukota.

⁸Zvaunenge waona nameso ako usakurumidze kuzvikwirira dare ungadaro pokupedzisira ukazonyadziswa nomumwe wako.

⁹Kurukurirana nomumwe wako iyeyo asi usaburitse zvakavandika zvomumwe.

¹⁰Anokunzwa iyeyo angadaro akazokunyadzisa. Kunyara kwako hakuzoperi.

¹¹Shoko rinotaurwa panguva yaro rakaita somufananidzo wemaapuru endarama wakakwenenzverwa mundiro yesirivha.

¹²Kumunhu ane nzeve dzokunzwa munhu anomutsiura akaita semhete yendarama kana chishongo chendarama.

¹³Kune vanotuma nhumwa yakatendeka yakaita sokutonhora kwamazaya echando panguva yokukohwa anonyevenutsa mwoyo yavatenzi vake.

¹⁴Munhu ane chipo chaanofanira kupa chaasingapi, akafanana namakore nemhepo zvisina mvura.

¹⁵Mutongi anogona kunyengererwa nemwoyo murefu. Rurimi runyoro rwunotyora mapfupa.

¹⁶Kana wawana uchi ingodya hwakakwanirana ungadaro ukagutisa ukazorutsa.

¹⁷Rega kuramba gumbo rako richienda pamba pomumwe wako angadaro akafinhwa newe akazokuvenga.

¹⁸Munhu anopupurira mumwe wake nhema wakafanana netsvimbo yehondo kana bakatwa kana museve wakapinza.

¹⁹Kuvimba nomunhu asingavimbiki pazuva renhamo, kwakafanana nezino rinorwadza kana rutsoka runotsvedzemuka.

²⁰Kuimbira munhu akasuruvara kwakafanana nomunhu anobvisa bhachi pazuva rinotonhora kana kuisa vhiniga paronda.

²¹Kana muvengi ane nzara mupe chokudya kana ane nyota mupe mvura yokunwa

²²nokuti izvozvo kutotutira mazimbe omoto pamusoro pake Tenzi achakupa mubayiro.

²³Mhepo yokuchamhembe inounza mvura rurimi rwemakuhwa runokonzera kutsamwa.

²⁴Zviri nani kugara pakona yedenga remba pane kugara mumba nomukadzi anenharo.

²⁵Zvakangoita mvura inotonhorera kumunhu anenyota ndozvakaita shoko rakanaka rinobva kunyika iri kure.

²⁶Mururami anobvuma zvavaipi akafanana nemvura yabvongodzwa kana kasipiti kakashinhirwa.

²⁷Hazvina kunaka kudya uchi hwakawanda naizvozvo kutsvaka kurumbidzwa ita kushoma.

²⁸Munhu asingakwanise kuzvibata akafanana neguta rakapazika rikasara risina rusvingo.