Read Bhaibhiri Idzva rechiShona Tsumo 26 Bible Online

Tsumo 26 - Bhaibhiri Idzva rechiShona bible

Tsumo 26

¹Benzi harikodzeri kukudzwa sezvakangoita kuwana chando pazhizha kana mvura yokunaya pachirimo.

²Sokubhabhama kunoita shiri uye sokubhururuka kunoita nyenganyenga ndozvakaita kurengerera rushambwa pasina chikonzero, hakubatirire.

³Bhiza rinoda tyava mbongoro inoda matomhu musana webenzi unoda shamhu.

⁴Usapindure benzi sebenzi ungadaro ukafanana naro.

⁵Pindura benzi maererano noupenzi hwaro kuti rirege kuzvitutumadza serakangwara.

⁶Kutumira shoko nebenzi unopera tsoka uye kutozviparira.

⁷Sezvakangoita makumbo echirema anongorembera zvawo ndozvakangoita tsumo pamuromo pebenzi.

⁸Kuremekedza benzi kwangofanana nokuisa dombo murekeni.

⁹Sezvakangoita munzwa mumaoko echidhakwa ndozvakaita tsumo mumuromo webenzi.

¹⁰Kupinza benzi basa kwakaipa kupinda kupinza basa mupfuuri nenzira.

¹¹Zvakangoita imbwa inodya marutsi ayo ndozvakaita benzi rinodzokorora upenzi hwaro.

¹²Wakamboona here munhu anozviti pachake iye mungwaru? Benzi riri nani pane munhu iyeyo.

¹³Nyope inoti munzira mune shumba mumugwagwa mune mhondoro.

¹⁴Gonhi rinotenderera pamahinjisi aro ndozvinoita tsimbe pauriri hwayo.

¹⁵Nyanungo anoti ruoko mundiro tindindindi achizoita nungo dzokurudzorera kumuromo.

¹⁶Tsimbe inozviona seyakangwara kupinda vanhu vanomwe vanokwanisa kupindura zvino musoro.

¹⁷Munhu anozvipinza mugakava risiri rake akafanana nomunhu anoti imbwa iri kupfuurawo napanzeve kachi.

¹⁸Zvakaita benzi rinokanda zvitsiga zvomoto nemiseve norufu

¹⁹ndozvakaita munhu anonyengedza mumwe wake ozoti, “A, kuseka zvangu.”

²⁰Pasina huni moto unodzima, pasinawo munhu wamakuhwa zvokupopotedzana zvinopera.

²¹Zvakangoita marasha kumazimbe omoto uye huni kumoto ndizvo zvakaita munhu wenharo kumutsa muchokoto.

²²Mazwi emunhu anotaura makuhwa anenge misuva inonaka, inonyatsoti dyoo mukatikati momuviri.

²³Sakaya kanopenyerera kakakwenenzverwa kuputira ndiro ndozvine miromo inotaura zvinyoronyoro [21] asi nemwoyo wakaipa.

²⁴Munhu anovenga anonyengedza nemiromo yake, iye akavanza unyengedzi mumwoyo make.

²⁵Kana achitaura zvakanakisisa rega kuzvigamuchira ane zvinhu zvinomwe mumwoyo make zvinosemesa.

²⁶Kuvenga kwake kungavanzwe zvako nounyengedzi asi uipi hwake hunoburitswa pachena pagungano.

²⁷Anochera gomba, achawira mariri, dombo rinotsitsirira anotanga kurigudumutsa.

²⁸Munhu worurimi runonyepa anovenga vaanonyepera, munhu womuzvambarara[22] imharadzi.