Read Bhaibhiri Idzva rechiShona Tsumo 27 Bible Online

Tsumo 27 - Bhaibhiri Idzva rechiShona bible

Tsumo 27

¹Usazvitutumadze nezvamangwana nokuti hauzivi zvichauya mune ramangwana.

²Rega mumwe akurumbidze kwete muromo wako, angave mutorwa zvake kwete miromo yako.

³Dombo rinorema, jecha rinorema asi hasha dzebenzi, dzinorema kupinda izvozvo zviri zviviri.

⁴Hasha dzina utsinye, kugumbuka kunowodzvoka asi ndiani angamirisane neshanje.

⁵Kutsiurwa pachena kuri nani pano kudiwa zvakavanda.

⁶Mavanga eshamwari maronda kwawo asi muvengi anotsvoda kakawanda.

⁷Munhu akaguta haadi kana uchi asi kune ane nzara kana zvinovava zvinotapira.

⁸Sezvinoita shiri inorasika padendere payo, ndozvinoita munhu anorasika pamusha pake.

⁹Mafuta netunonhuwirira twokuzora tunofadza mwoyo ndozvakaita ushamwari hwakanaka pane umbimbindoga.[23]

¹⁰Usarasane neshamwari yako kana shamwari yababa vako. Pazuva redambudziko rako usaende kumba yomukoma kana munun'una wako. Muvakidzani newe ari padyo ari nani pane mukoma kana munun'una ari kure.

¹¹Iva munhu akangwara, mwanangu uite kuti mwoyo wangu ufare kuitira kuti ndiwane mhinduro kune anonditsoropodza.

¹²Munhu akachenjera akaona njodzi anovanda asi dununu romunhu rinongoenda rozotambura nazvo.

¹³Munhu anomiririra chikwereti chomunhu waasingazivi ngaatorerwe hanzu yake ive chitsidzo chokumiririra kwake chikwereti chomunhu waasingazivi.

¹⁴Munhu anokwazisa muvakidzani naye achiita zvokutomukira mangwanani-ngwanani achizhamba akafanana nomunhu anorengerera mumwe rushambwa.

¹⁵Imba inoramba ichidonha pazuva remvura nomukadzi ane pamuromo zvakafanaka.

¹⁶Kuedza kumuvigiridza kwakafanana nokuvigiridza mhepo kana munhurume kupfumbata mafuta.

¹⁷Simbi inorodza imwe simbi vanhu vanofanira kuvandudzana.

¹⁸Munhu anokudza muonde anozodya muchero wawo uye munhu anochengetedza tenzi wake anozoremekedzwa.

¹⁹Sezvinoita mumvura uso hunoona uso imomo mumwoyo munhu anozviona kuti munhui.

²⁰Nzvimbo yavafi nenzvimbo yokuparadza hazviguti mazisowo avanhu haaguti.

²¹Bisiro ndere sirivha virira ndere ndarama, mbiri yomunhu inoonesa zvaari.

²²Unogona zvako kutswa benzi muduri pamwechete nembeswa asi upenzi hwaro haubve pariri.

²³Nyatsoziva mamiriro ezvipfuwo zvako unyatsochengetedza mombe dzako

²⁴nokuti upfumi haugari narini narini ndaza inogara nokusingaperi here?

²⁵Kana uswa hwapera ruswiswi rwukabuda zvinofura mombe mumakomo zvaunganidzwa

²⁶hwayana dzinokuwanisa zvokupfeka, mari yembudzi inokutengera munda

²⁷uchawana mukaka wembudzi wokudya wakakwana nokudya kwemhuri yako, uye kwokuriritirawo vashandi vako vechikadzi.