Read Bhaibhiri Idzva rechiShona Tsumo 28 Bible Online

Tsumo 28 - Bhaibhiri Idzva rechiShona bible

Tsumo 28

¹Akaipa anotiza pasina anomudzingirira asi vakarurama vane chivindi kunge shumba.

²Munyika mukapandukwa vatongi vanowanda asi kana muine munhu anonzwisisa ane ruzivo inoenderera mberi yakatsiga.

³Murombo anodzvinyirira vamwe varombo zvakaipa imvura inopurana zvayo isina chokudya chainosiya.

⁴Vanoramba mutemo vanorumbidza vaipi asi vanochengeta mutemo vari kutorwisana navo.

⁵Vaipi havanzwisisi ruenzaniso asi vanotsvaka Tenzi vanonyatsorunzwisisa.

⁶Zviri nani kuva murombo ari pachokwadi pane mupfumi ane tsika dzakanzvongama.

⁷Mwana anochengeta mutemo ano ungwaru, anoshamwaridzana nemharadzi dzevana anonyadzisa baba vake.

⁸Munhu anowanziridza upfumi hwake nechimbadzo kana kungowedzerawo anounganidzira munhu ane tsiye nyoro kuvarombo.

⁹Kana munhu aisa zvimiti munzeve kumutemo kunyange munamato wake unosemesa.

¹⁰Munhu anotsautsira mururami kunzira yakaipa anowira mugomba rake asi vanhu vasina mhaka vachawana nhaka yakanaka.

¹¹Mupfumi anozviona semungwaru asi murombo anonzwisisa anomubata zvaari.

¹²Kana vakarurama vakakunda, kunopemberwa vakaipa vakawana chinzvimbo chapamusoro vanhu vanozvivanza.

¹³Munhu anoviga unyangadzi hwake haabudiriri, asi anoreurura achisiyana nazvo anonzwirwa tsitsi.

¹⁴Akakomborerwa zvake munhu ane kakuzeza nguva dzose asi munhu anoomesa mwoyo achapinda nhamo.

¹⁵Mutongi wakaipa akaita seshumba inodzvova kana sebere rinorwisa varombo.

¹⁶Mutongi asinganzwisisi munhu anobata vanhu noutsinye. Asi munhu anovenga kuwana zvinhu nenzira isiriyo anowana upenyu hurefu.

¹⁷Munhu anoremerwa nemhosva yokuuraya munhu iguva raakazviparira, regai akadaro.

¹⁸Munhu anoita zviri pachokwadi, achanunurwa asi ano upenyu hwoujarijari achatopaputsika.

¹⁹Munhu anorima munda wake, anowana chokudya chakawanda asi munhu anotandana nezvisina maturo urombo huchamuwandira.

²⁰Munhu akavimbika, anowana makomborero akawanda asi munhu anoda kukurumidza kupfuma haazoregi kurangwa.

²¹Rusarura rwakaipa, pamusana pechidimbu chechingwa munhu anotogona kuva wakaipa.

²²Munhu anonyima anomhanyirira upfumi asi haazivi kuti achashaiwa

²³Munhu anotsiura mumwe ndiye anotozoremekedzwa kupinda muzvambarara wokunyengedza norurimi rwake.

²⁴Anobira baba kana amai vake achiti hakusi kukanganisa ishamwari yemharadzi.

²⁵Munhu anemakaro anomutsa muchokoto asi anovimba naTenzi anopfumiswa.

²⁶Munhu ane umbimbindoga ibenzi; anoita zvinhu noungwaru anonunurwa.

²⁷Munhu anopa kuvarombo hapana chaanozoshaya asi asingavacheuki anova nejambwa guru.

²⁸Vaipi vakawana chinzvimbo chapamusoro vanhu vanozvivanza, kana vakaparara vakarurama vanobudirira.