Read Bhaibhiri Idzva rechiShona Tsumo 29 Bible Online

Tsumo 29 - Bhaibhiri Idzva rechiShona bible

Tsumo 29

¹Munhu anotsiurwa kakawanda asinganzwi, achayerekana atyoka zvisingarapiki.

²Kana varurami vari ivo vari kutonga vanhu vanofara asi kana vaipi vari ivo varikutonga vanhu vanodemba.

³Munhu anoda ungwaru anoita kuti baba vafare asi anoita ushamwari nezvifeve anozviparadzira upfumi hwake.

⁴Mambo akatonga noruenzaniso nyika inogarika asi anopopera zvipo anoiparadza.

⁵Munhu anobata mumwe wake kumeso ari kutomuteya tsoka nemambure.

⁶Muipi anoteyewa nechakaipa chake asi mururami anoimba achifara.

⁷Mururami anoziva zvinokodzera kuitirwa varombo asi akaipa haanzwisisi izvozvo.

⁸Vashori vanonyandutsa guta asi vangwaru vanopodza hasha.

⁹Kana mungwaru akaitirana nharo, nebenzi, benzi rinopengereka richiseka-seka, hapaiti runyararo.

¹⁰Vaurayi vanovenga vari pachokwadi, vakaipa vanotsvaka kumupedzisa upenyu.

¹¹Benzi rinoratidza hasha dzaro dzose asi munhu akangwara anozvibata achizvidzora.

¹²Kana mutongi akateerera makuhwa makurukota ake ose achava vanhu vakaipa.

¹³Chavanofanana vapfumi navarombo chimwechete chokuti Tenzi ndiye anovhenekera meso vose vari vaviri.

¹⁴Kana mambo akatonga varombo zvakarurama chigaro chake choumambo chinobva chadzika midzi.

¹⁵Shamhu nokutsiura zvinopa ungwaru asi mwana akaregererwa anonyadzisa amai vake.

¹⁶Kana vakaipa vari ivo vari kutonga kutadza kunowanda, asi vakarurama vachavaona vachiputsika.

¹⁷Dzidzisa mwana wako, iye achakupa zororo achakufadza mwoyo.

¹⁸Kana pasina zviratidzo vanhu inova njake njake; asi akakomborerwa zvake anochengeta mutemo.

¹⁹Muranda haadzoreki namazwi chete kunyange akanzwisisa haamboita hanya nazvo.

²⁰Ukaona munhu anokurumidza kutaura, benzi rine charinotowana kupinda iye.

²¹Munhu akaregerera muranda kubvira pauduku hwake mushure mezvo anomugarira nhaka.[24]

²²Munhu wehasha anomutsa manyongori nyahasha anokonzera kutadza kwakawanda.

²³Kuzvikudza kunoderedza munhu pasi asi munhu anozvirereka, anozokudzwa.

²⁴Anobatsirana nembavha anovenga upenyu hwake anonzwa zvake kurengererwa rushambwa kunoitwa mudare asi hapana chaanodura[25]

²⁵Kuzeza vanhu iriva asi anovimba naTenzi hapana chinomuwana.

²⁶Vazhinji vanotsvaka chizivano nomutongi asi anotonga zvine ruenzaniso ndiTenzi.

²⁷Munhu asina ruenzaniso anosemesa kuvarurami asi ari pachokwadi anosemesawo kumuipi.