Read Bhaibhiri Idzva rechiShona Tsumo 3 Bible Online

Tsumo 3 - Bhaibhiri Idzva rechiShona bible

Tsumo 3

¹Mwanangu usakanganwe chidzidziso changu, mwoyo wako ngauchengete mitemo yangu

²nokuti zvichakupa mazuva mazhinji namakore oupenyu akawanda uye kugarika kukuru.

³Usasiane nokuvimbika nokutendeseka zvisungirire muhuro, zvinyore pachiredhi chemwoyo wako.

⁴Naizvozvo uchava nezita rakanaka uchifarirwa naMwari navanhu.

⁵Vimba naTenzi nomwoyo wako wose usavimbe nokuona kwako zvinhu nemazvo.

⁶Muzviito zvako zvose muzive, iye achatasanudza nzira dzako

⁷usazviite munhu anoziva itya Tenzi ufuratire uipi.

⁸Zvichakurapa muviri[5] wako zvigonyava mapfupa ako.

⁹Remekedza Tenzi nezvaunazvo uye nembesanwa dzinotanga kuibva.

¹⁰Matura ako anobva azadzwa nezvakawanda makuvi ako ewaini anozopfachukira.

¹¹Mwanangu usashore kudzidziswa kwaunoitwa naTenzi kana kuneta nokukutsiura kwaanoita

¹²nokuti Tenzi anotsiura wavanoda sezvinoita baba mwana waanoda.

¹³Akakomborerwa munhu anowana ungwaru, munhu anowana kunzwisisa,

¹⁴nokuti zvinowanikwa mahuri zviri nani pano zvinowanikwa musirivha uye zvibereko zvahwo zvinokunda zvibereko zvendarama.

¹⁵Ungwaru hwakakosha kukunda zvishongo, hapana chaungade chingaenzaniswe nahwo.

¹⁶Murudyi rwahwo muno upenyu hurefu muruboshwe mahwo muno upfumi norukudzo.

¹⁷Nzira dzahwo inzira dzinofadza uye maitiro ahwo ndoorugare.

¹⁸Muti woupenyu kuna vanohuwana. Vanohubatisisa vanonzi vakakomborerwa zvavo.

¹⁹Noungwaru Tenzi akadzika ugaro hwapasi akamisawo nokunzwisisa kwake[6] denga.

²⁰Noruzivo rwake akaita pasi-pasi patubuke mvura uye kuti makore adonhedze dova.

²¹Mwanangu chengeta ungwaru chaihwo uye kugona kusarudza ngazvirege kupunyuka maziso ako.

²²Zvichava hupenyu hwako uye chishongo chomutsipa wako.

²³Ipapo unozofamba nzira yako pasina chinokuwana tsoka yako haizogumburwi.

²⁴Kana wagara hauzotya uye paunorara uchavata hope dzakanaka.

²⁵Hauzotya chivhundumukira chezvinotyisa kana pfumvu yowira vaipi,

²⁶nokuti Tenzi ndiye waunovimba naye. Iye achachengeta tsoka yako kuti irege kubatwa nomusungo.

²⁷Usarege kuitira munhu anokodzera kuitirwa zvakanaka kana uchizvikwanisa.

²⁸Usati kuno mumwe wako enda zvako uzouyazve, mangwana ndozokupa asi iwe uinacho.

²⁹Usaronge kuitira mumwe wako zvakaipa anogara pamwechete newe achivimba newe.

³⁰Rega kumutsana nomunhu pasina chiripo, asina chaakutadzira.

³¹Usaitire shanje munhu weganyavhu usasarudze kana imwe yenzira dzake

³²nokuti Tenzi anosema munhu ano mwoyo wakaipa asi munhu ari pachokwadi munhu wake wapamwoyo.

³³Tenzi anoita kuti imba yomunhu wakaipa iwirwe norushambwa asi dzimba dzavakarurama anodzikomborera.

³⁴Vanoshora anovashorawo asi vanozvidukupisa anovaitira mwoyochena.

³⁵Vangwaru vanowana mugove worukudzo asi mapenzi, chavo kuwanziridza kunyara.