Read Bhaibhiri Idzva rechiShona Tsumo 30 Bible Online

Tsumo 30 - Bhaibhiri Idzva rechiShona bible

Tsumo 30

¹Mashoko aAguri mwanakomana waJake wokuMasa. Gamba irori rakataura kuna Itieri[26] kuna Itieri naUkari richiti,

²“Ndiri benzi chairo romunhu, handinzwisisi somunhu.

³Handina kudzidza ungwaru uye iye Anoera handimuzivi.

⁴Ko ndiani akambokwira kudenga akaburuka? Ndiani ati aunganidza mhepo muchanza chake? Ndiani amboti aputira mvura mujira? Ndiani akaisa miganhu yose yenyika? Zita rake ndiani, mwana wake mukomana zita rake ndiani, kana uchiriziva?

⁵Izwi roga roga raMwari rakaoneswa kuti nderechokwadi. Ndiye nhoo yavanopotera kwaari.”

⁶Usawedzere kumazwi ake angadaro akakutsiura wozoonekwa kuti uri munyepi.

⁷Ndinokukumbirai zvinhu zviviri ndisati ndafa, musandinyime.

⁸Ndibvisirei pandiri kunyepa nokureva nhemha musandipe kupfuma kana kuva murombo. Ndipeiwo chikamu changu chokudya.

⁹Ndingadaro ndikati tundu kuzara ndikazokurambai ndichiti Tenzi ndiani kana kuti ndingazova murombo ndikaba, ndikazoshoresa zita raMwari wangu.

¹⁰Rega kuudzisira muranda kuna tenzi wake angadaro akakurengerera rushambwa ukazova nemhosva.

¹¹Kuna vamwe vanhu vanorengerera madzibaba avo rushambwa vasingati amai vavo ngavakomborerwe.

¹²Kuna vamwe vanhu vanozviona savakachena asi ivo vasina kuchenurwa pakun'ora kwavo.

¹³Kuna vamwe vanhu; katarisiro kavo ndokokuzvikudza chaiko matarisiro avo kuzvida koga-koga.

¹⁴Pana vanhu vane meno anenge mapakatwa mazino avo mapanga chaiwo okuzhanya nawo varombo panyika navasina chavanacho pakati pavanhu.

¹⁵Chikwekwe chine vana vaviri: Ndipe naNdipe. Pane zvinhu zvitatu zvisingaguti kutosvika zvina zvisingati ndaguta

¹⁶ndezvizvi zvinoti: Nzvimbo yavafi mukadzi asina mbereko nyika isingaguti mvura nemoto usingati zvakwana.

¹⁷Munhu aneziso rinoshora baba risingade kuona zvokuteerera amai achachochonhwa namakunguwo omubani; achadyiwa namagora.

¹⁸Pane zvinhu zvitatu zvinondishamisa kwazvo zvinotosvika zvina zvandisinganzwisisi,

¹⁹zvinoti: Nzira yegondo mudenga nzira yenyoka paruware nzira yechikepe mugungwa guru maitiro omurume nomusikana.

²⁰Ndizvo zvinoita pfambi inodya yopukuta muromo yoti hapana kutadza kwandaita.

²¹Kune zvinhu zvitatu zvinodengenyesa nyika kutosvika zvina zvaisingagoni kutirira zvinoti:

²²Muranda anova mambo, benzi kana raguta,

²³mukadzi asingadiwe azowana murume uye kana musikana webasa akatsiva amai vemba.

²⁴Pane zvinhu zvina panyika zvidiki zvazvo asi zvina ungwaru, ndezvizvi zvinoti:

²⁵Masvosve rudzi rusina simba asi anozviunganidzira chokudya pazhizha.

²⁶Mbira hadzisi rudzi rune simba asi dzinoita misha yadzo mumabwe.

²⁷Mhashu hadzina mambo asi dzinofamba dzakaita rundaza.

²⁸Unogona kubata dzvinyu muruoko asi woriwana riri mumuzinda wamambo.

²⁹Kune zvinhu zvitatu zvinozvidadisa pakufamba kutosvika zvina zvinozvikakanyadza

³⁰kunoti shumba ine simba kupinda dzimwe mhuka isina yainozeza

³¹kwouya jongwe rinokekeredzera, kwotiwo gotora namambo ana varwi vake.

³²Kana wakaita upenzi hokuzvitutumadza kana une twawanga uchironga twakaipa bata muromo wako.

³³Kusvina mukaka kunowanisa ruomba kudzvanya mhuno kunobudisisa ropa, saizvozvo kudzvikinyidza hasha kunomutsa gakava.