Read Bhaibhiri Idzva rechiShona Tsumo 31 Bible Online

Tsumo 31 - Bhaibhiri Idzva rechiShona bible

Tsumo 31

¹Mashoko aRimueri mambo wokuMasa aakadzidziswa naamai vake.

²“Chii ichocho mwanangu, ndochii ichocho mwana wokubereka nhai mwana wangu wechitsidzo changu.

³Usazviise mumaoko avakadzi uchizvipa kuna vanoparadza madzimambo.

⁴Hachisi chinhu chamadzimambo Rimueri, kunwa waini kana vatongi kuda hwahwa,

⁵nokuti vangadaro vanwa vakakanganwa zvakatemwa vachizokanganisa zvinofanira kuitirwa varombo.

⁶Doro rinopiwa munhu avakuparara wainiwo vakasuruvara zvokufa.

⁷Ndivo vanganwe zvavo kuti vakanganwe urombo hwavo kuti vasayeukezve nhamo dzavo.

⁸Taura wakamiririra mbeveve umiririre zvinofanira kuitirwa vatamburi.

⁹Zarura muromo wako utonge zvakarurama umiririre varombo navashaiwi.”

¹⁰Ndiani zvake akawana mukadzi wakanaka anokosha zvikuru kupinda zvishongo.

¹¹Mwoyo womurume wake unovimba naye. Haashaye chaanowana.

¹²Anomuitira zvakanaka kwete zvakaipa mazuva ose oupenyu hwake.

¹³Anotsvaka wuru netseta achishanda nomwoyo unoda.

¹⁴Akaita sengarava dzomushambadzi anobva nechokudya chake kure.

¹⁵Anomuka huchiri usiku achipa mhuri yake zvokudya uye basa kuvasikana vake vebasa.

¹⁶Anotsvaka munda wokutenga, anosima munda wemigirepisi nesimba remaoko ake

¹⁷anogwinyisa chiuno nokusimbisa maoko,

¹⁸anoona kuti zvinhu zvake zvinofamba zvakanaka rambi rake haridzimi usiku hwose.

¹⁹Anotambanudzira maoko ake kuchivhimbo chewuru achibata chokurukisa neminwe yake.

²⁰Anozarura ruoko rwake kupa varombo achitambanudzira maoko ake kune vasina chavanacho.

²¹Haatyiri imba yake chando nokuti mhuri yake yose inenge yakapfeka zvitsvuku.

²²Anozvigadzirira oga zvokufukidza nazvo mubhedha wake, hanzu dzake ndedzerineni yakanakisisa dzeruvara rwohute.

²³Murume wake munhu anozivikanwa padare kana agere pakati pavakuru-vakuru venyika

²⁴anoita machira erineni achiatengesa achiwanisa vashambadzi mabhande.

²⁵Simba nechiremera ndozvipfeko zvake, anotosekerera mazuva ari kuuya.

²⁶Anozarura muromo wake noungwaru uye zvokudzidzisa tsitsi ndozviri pamuromo pake.

²⁷Anoongorora kuti mhuri yake yakagara sei, haadyi chokudya chounyope.

²⁸Vana vake vanosimuka vachimuti, “Makakomborerwa,” uyewo murumwe wake anomurumbidza achiti,

²⁹“Vakadzi vazhinji vakaita zvakanakisisa asi iwe unovakunda vose.”

³⁰Kuyevedza kunonyengedza, runako haruna maturo asi mudzimai anotya Tenzi anofanira kurumbidzwa.

³¹Anofanira kurumbidzwa pamusana pezvaakaita namaoko ake ngaarumbidzwe namabasa ake padare.