Read Bhaibhiri Idzva rechiShona Tsumo 4 Bible Online

Tsumo 4 - Bhaibhiri Idzva rechiShona bible

Tsumo 4

¹Chinzwai vanangu chidzidziso chababa muteerere kuti muone zvinhu nemazvo

²nokuti ndichakupai mirao yakanaka, musakande pasi zvandinokudzidzisai.

³Zvandaiva mukomana ndiina baba vangu, ndichiri mudiki, ndichingove ndini mwana mumwechete waamai vangu

⁴vakandidzidzisa vachiti, “Chengeta nomwoyo wose zvandinokutaurira chengeta mitemo yangu kuti urarame.

⁵Iva noungwaru uone zvinhu nemazvo usakanganwe, usatsauke pamashoko omuromo wangu.

⁶Usasiane noungwaru, ihwo huchakuchengeta hude, ihwo huchakuchengetedza.

⁷Chinhu chokutanga[7] paungwaru, wana ungwaru. Pana zvose zvaungawane wana kunzwisisa.”

⁸Huremekedze zvikuru ihwo huchakusimudzira kana ukahumbundira.

⁹Hunokudzika tsungare yamaruva mumusoro hugokugadza ndaza yakanaka.

¹⁰Teerera mwanangu, utambire zvandinokutaurira kuti makore oupenyu hwako awande.

¹¹Ndakakudzidzisa nzira dzoungwaru ndikakutungamirira mumakwara ukava pachokwadi.

¹²Kana wofamba, nhanho dzako hadzizovhiringidzwi, kana womhanya haugumburwi.

¹³Batisisa zvaunodzidziswa, usazvikande pasi, ramba wakazvichengeta nokuti ndihwo upenyu hwako.

¹⁴Usafambe namakwara avaipi kana kutevera nzira dzavakaipa.

¹⁵Siana nayo, usadimure nekwairi. Tsaukana nayo uinyenyeredze.

¹⁶Ndinodaro nokuti havakwanisi kuvata kana vasina kuita zvakaipa, havawane hope, kusvikira vatovhiringidza mumwe munhu,

¹⁷nokuti uipi ndicho chokudya chavo uye utsinye ndiyo waini yavanonwa.

¹⁸Gwara ravarurami rakaita samambakwedza anoramba achingochena kusvikira ava masikati makuru.

¹⁹Asi nzira yavakaipa yakaita sezarima havambozivi chinogumbura.

²⁰Mwanangu teerera mashoko angu rerekera nzeve yako kune zvandinoreva.

²¹Ngazvirege kupunyuka ziso rako zvichengete mumwoyo mako

²²nokuti upenyu kuna anozviwana uye zvinorapa nyama yake yose.

²³Nyatsochengetedza mwoyo wako nomwoyo wose nokuti mauri ndimo mune zvisipiti zvoupenyu.

²⁴Bvisa mauri muromo wenhema uye pamuromo pako kutaura zvisizvo.

²⁵Kutarisa kwako ngakuti twasa, yeva zviri pamberi pako.

²⁶Tanga wafunga nzira yauchafamba nayo. Nzira dzako dzigove muchechetere

²⁷usatsaukire kurudyi kana kuruboshe tsoka yako ngairege kuenda kunezvakaipa.