Read Bhaibhiri Idzva rechiShona Tsumo 5 Bible Online

Tsumo 5 - Bhaibhiri Idzva rechiShona bible

Tsumo 5

¹Mwanangu teerera ungwaru hwangu rerekera nzeve yako kumazwi angu okunzwisisa

²kuti uchengetedze kuziva kusarudza uye miromo yako ichengete ruzivo.

³Miromo yomukadzi asiwako inodonha uchi zvaanotaura zvinotsvedzerera kupinda mafuta

⁴asi pokupedzisira anokarakata segavakava akapinza sebakatwa rinocheka kose.

⁵Tsoka dzake dzinoenda kurufu nhanho dzake kuvafi ndiko kwadzo.

⁶Haambofungi nezvenzira inoeda kuupenyu, nzira dzake dzinopota-pota asi haazvizivi.

⁷Zvino vanangu ndinzwei musasiane namazwi omuromo wangu

⁸tambira kure naye usambosvika zvako pedyo nomusuo wemba yake.

⁹Ungadaro ukapa rukudzo rwako kunavamwe uye makore ako kuna vasina tsitsi

¹⁰vamwewo vanhu vangadaro vakutorera upfumi hwako zvawakashandira zvikaenda kumutorwa.

¹¹Pakupedzisisa poupenyu hwako unozowuwura nyama yako nomuviri zvadyiwa zvino wavakuti,

¹²“Chandakarambirawo zvangu kudzorwa chiiko, mwoyo wangu uchishora kutsiurwa.

¹³Ndairamba kuteerera zvaitaurwa navarairidzi vangu kana kurerekera nzeve yangu kuvadzidzisi vangu.

¹⁴Ndakanga ndasvika pokutoparara zvachose mukati megungano rakaungana.”

¹⁵Inwa mvura inobva mumugodhi wako mvura inoerera inobva mutsime rako.

¹⁶Zvisipiti zvako zvongoyerera nenyika here mihoronga yemvura yako iyerere mumigwagwa zvayo here?

¹⁷Ngaive yako yoga kwete yevatorwa vaunavo.

¹⁸Rega kasipiti kako kakomborerwe ufadzwe nomukadzi wapahudiki hwako

¹⁹sesheshe yemhembwe kunaka, senhunzvi yengururu yakanakisa kukuda kwake ngakukuzadze nokufara ugutsikane nguva dzose norudo rwake.

²⁰Sei uchibatwa mwoyo mwanangu, nomukadzi asiwako uchimbundira chipfuva chepfambi?

²¹Chiripo ndechokuti Tenzi anoona zviito zvomunhu anotarisa nzira dzake dzose.

²²Munhu anoteewa nouipi hwake anobatwa mubasa rake iroro rechitadzo.

²³Anofa pamusana pekutadza kuzvibata uye anorasika pamusana poupenzi hwake hukuru.