Read Bhaibhiri Idzva rechiShona Tsumo 7 Bible Online

Tsumo 7 - Bhaibhiri Idzva rechiShona bible

Tsumo 7

¹Mwanangu, chengetedza mashoko angu upfimbike mitemo yangu mauri.

²Chengeta mitemo yangu urarame chengeta mirao yangu semboni yeziso rako.

³Isungirire paminwe yako. Inyore pakafendefa kemwoyo wako,

⁴iti kuungwaru, “Uri hanzvadzi yangu.” Kunzwisisa ukuti, “Ndiwe shamwari yangu yapamwoyo.”

⁵Zvinokudzivirira kumukadzi asiwako, mukadzi pfambi worurimi rwunotapira.

⁶Nokuti ndiri pahwindho remba yangu ndakatarisa napasefa yangu.

⁷Ndakaona pakati pevoruzhinji ndikaongorora pane vechidiki jaya risina njere,

⁸richipfuura nepedyo nomukadzi uya richienda nenzira inoenda kumba kwake

⁹nguva yoruvhunzavaeni kumanheru panguva yousiku, yerima.

¹⁰Ndopandakaona mukadzi osangana naye akapfeka sepfambi aine zvaainanga

¹¹achipupira kwazvo kutaura asingagari pamba.

¹²Akamboti mumugwagwa, hoyo kumusika anogaririra pakona dzose dzose.

¹³Akamubata akamutsvoda akati kwaari, zvisina nenyadzi dzose,

¹⁴“Ndanga ndiine chibayiro chokuti ndipire ndazadzisa nhasi mhiko dzangu.

¹⁵Ndokusaka ndauya, kuzokuchingura ndichikutsvagisisa zvino ndakuwana.

¹⁶Ndawaridza mubhedha wangu zvakanaka namachira emavara-mavara okuIjipiti erineni.

¹⁷Ndapfapfadzira mubhedha nemura, nearoi nechinamoni.

¹⁸Uya tigutsane nezvorudo kusvikira kwaedza ngatifadzane nerudo

¹⁹nokuti murume wangu haapo, akafamba rwendo rurefu.

²⁰Akatakura katsapo kemari anozodzoka mwedzi wave jenaguru.”

²¹Akamugombedzera namashoko mazhinji okunyengetedza, namazwi ake akanyorovera akamumanikidza.

²²Iyewo akabva amutevera pakarepo senzombe iri kuenda kundouraiwa, sebenzi[8] riri kutungamidzwa kuchitokisi

²³kusvikira abaiwa mudumbu, seshiri inomhanyira muriva, asingazivi kuti kuparara kwoupenyu hwake.

²⁴Zvino imi vanakomana ndinzwei muteerere mashoko omuromo wangu.

²⁵Mwoyo wako ngaurege kupindukira kunzira dzake usagare munzira dzake

²⁶nokuti vaakakuvadza akarigira pasi vakawanda.

²⁷Imba yake inzira yokuenda kunzvimbo yavafi, inodzika kudzimba dzorufu.