Read Bhaibhiri Idzva rechiShona Tsumo 8 Bible Online

Tsumo 8 - Bhaibhiri Idzva rechiShona bible

Tsumo 8

¹Inga ungwaru hunodanidzira wani, runzwisiso rwunoshevedzera wani

²huri pachiturunhuru chiri pedyo nenzira, hunomira pamharadzano dzenzira

³Uye parutivi pesuo guru mberi kweguta, kokupinda nako, hunodaidzira pamusuo.

⁴“Ndinodaidzira kwamuri, imi vanhu, wandinoshevedzera ndimi vanhu.

⁵Imi voruzhinji dzidzai uchenjeri, imi mapenzi ivai nemwoyo unonzwisisa.

⁶Teererai nokuti ndichataura zvinhu zvakakosha, mumuromo mangu muchabva zvakarurama.

⁷Muromo wangu uchataura chokwadi uipi chinhu chinosemesa kumuromo wangu.

⁸Mazwi angu ose akarurama, maari hamuna chakakombama kana chakaminama.

⁹Ose akati twasa kuna anonzwisisa uye akarurama kune vanowana ruzivo.

¹⁰Torai chidzidziso changu pano kutora sirivha uye ruzivo pane kutora ndarama yakanakisisa

¹¹nokuti ungwaru huri nani pane zvishongo, chose chaungade hapana chingaenzane nahwo.

¹²“Ini ungwaru ndinogara nouchenjeri, ndine ruzivo uye ndinoziva kusarudza.

¹³Kutya Tenzi kunoreva kuvenga uipi, ndinovenga kuzvikudza nokuzvitutumadza nokutaura kusina kururama.

¹⁴Ndine mazano noungwaru kwahwo ndinoziva chinonzi kusarudza uye ndine simba.

¹⁵Madzimambo ndini chavanotongesa nacho uye vatongi vanotema zvakarurama, chavanotema nacho ndini.

¹⁶Machinda chavanotonga nacho ndini uyewo vakuru vakuru, vose vanotonga pasi.[9]

¹⁷Ndinoda vanondida uye vose vanonditsvaka nomwoyo wose vanondiwana.

¹⁸Upfumi norukudzo ndinazvo uye upfumi hunogara uye hunokubudirira.

¹⁹Muchero wangu uri nani pane ndarama kunyange ndarama yakanakisa uye mukoho wangu unokunda sirivha yakanakisisa.

²⁰Ndinofamba nenzira yoururami namakwara oruenzaniso.

²¹Ndinopfumisa vanondida ndichivazadzira matura avo.

²²“Tenzi aiva neni pakutanga kwamaitiro ake chaiwo, ndini ndaiva chokutanga chezviito zvake zvakare.

²³Ndakaitwa pasichigare pakutanga chaipo nyika isati yatangiswa.

²⁴Ndakaberekwa hwenje husati hwavapo pasi pasati pava nezvisipiti zvizere nemvura.

²⁵Ndakaberekwa makomo asati aumbwa, zvikomo zvisati zvavapo,

²⁶asati aita pasi neminda yapo kana huruva yokutanga yapasi.

²⁷Paakasika matenga ndaivepo, paakaita denderedzwa, pamusoro pehwenje.

²⁸Paakasimbisa matenga kumusoro paakaita zvisipiti zvomuhwenje,

²⁹paakaisira gungwa miganhu yaro kuitira kuti mvura irege kutyora mitemo yake paakatara ugaro hwenyika,

³⁰ipapo ndaiva parutivi pake, ndiri nyakumupa mazano. Ndaiva varaidzo yake zuva nezuva ndichifara zvangu pamberi pake nguva dzose,

³¹ndichifara munyika yake igere vanhu uye ndichifara muvanhu.

³²“Zvino vanangu nditeererei, vakakomborerwa zvavo vanotevera nzira dzangu.

³³Teererai chidzidziso mungware, musachikande pasi.

³⁴Akakomborerwa zvake munhu anonditeerera, anondigaririra zuva nezuva pamisuo yangu mikuru, akamirira pedyo nemisuo yangu.

³⁵Nokuti anondiwana, anowana upenyu uye anofarirwa naTenzi.

³⁶Asi munhu anondipotsa anozvikuvadza vose vanondivenga vanoda rufu.”