Read Bhaibhiri Idzva rechiShona Tsumo 9 Bible Online

Tsumo 9 - Bhaibhiri Idzva rechiShona bible

Tsumo 9

¹Ungwaru hwakazvivakira imba, hwakazvivezera misimboti minomwe.

²Hwabaya zvibayiro zvahwo, hwasanganisa waini yahwo uye hwagadzira tafura yahwo.

³Hwatuma vasikana vahwo vebasa kundokokera vari panzvimbo dzakakwirira dzeguta.

⁴Kana uri munhuwo zvako tsaukira nepano kumunhu wose asina mano hunoti kwauri,

⁵“Uyai mudye chingwa changu munwe waini yandasanganisa.

⁶Siyanai nokusanzwisisa murarame mutevere nzira inoratidza kunzwisisa.”

⁷Anodzora anoshora, chake kunyombwa uye anotsiura munhu wakaipa anozviparira mavanga.

⁸Usatsiure anoshora, nokuti anozokuvenga ukatsiura mungwaru anokuda.

⁹Kupa mungwaru, kutomuwedzera ungwaru. Dzidzisa mururami dzidzo yake inotowedzerwa

¹⁰Kutya Tenzi ndiyo mviromviro youngwaru. Kuziva iye Anoera ndiko kunzwisisa ikoko

¹¹nokuti nokwandiri mazuva ako anowanziridzwa uye makore anopamhidzirwa kuupenyu hwako.

¹²Kana wakangwara zvinobatsira iwe kana uri munhu wokunyomba nhamo ndeyako.

¹³Rema romukadzi mukadzi anotaurisa, mukadzi asingazvibati asinganyari.

¹⁴Anongoti go kugara pamusuo wemba yake, anondogara panzvimbo dzakatunhumara dzomuguta,

¹⁵achidaidzira kuna vanopfuura nenzira vanenge vakanangana zvavo nerwendo rwavo

¹⁶achiti, “Kana uri munhuwo zvako tsaukira napano” kumunhu asina mano anoti,

¹⁷“Inga wani mvura yokuba inotapira uye chingwa chokudya muchivande chinonaka.”

¹⁸Murume anenge asingazivi kuti ipapa pana vakafa uye kuti vaenzi vomukadzi uyu vari pasi pasi penzvimbo yavafi.