Read Bhaibhiri Idzva rechiShona Muparidzi 1 Bible Online

Muparidzi 1 - Bhaibhiri Idzva rechiShona bible

Muparidzi 1

¹Mashoko omuparidzi, mwanakomana waDhavhidhi, mambo womuJerusaremu.

²Hazvinzwisisiki hazvinzwisisiki, ndozviri kutaura muparidzi, hazvinzwisisiki, zvinhu hazvinyatsonzwisisika.

³Nhai imi munhu anofireiko nebasa chaizvo, nokufondoka kwose kwaanoita pasi pezuva?

⁴Chimwe chizvarwa chinoenda chimwewo chizvarwa chichiuya asi nyika inoramba iripo chete.

⁵Zuvawo rinobuda, zuva rinodoka romhanyazve[1] iwee kunzvimbo kwaro kwarinobuda!

⁶Mhepo inoenda kumaodzanyemba yopishinukazve yoenda kuchamhembe, ichingotendererawo, ichingotenderera. Mhepo inoramba ichingoenda nemayamboenda namo imomo.

⁷Nzizi dzose dzinoyerera kugungwa asi gungwa harizari. Nzizi kwadzinoyerera dzinoyererazve ikoko.

⁸Zvinhu zvose zvinofinha, hapana angagone kuzvitaura. Ziso hariguti kuona kana nzevewo haiguti kunzwa.

⁹Zvakamboitika zvichaitikazve. Zvakamboitwa zvichaitwazve. Hapana chitsva pasi pezuva.

¹⁰Panechinhu here chinganzi ona chinhu icho chitsva. Chaivapo kare panguva yakare.

¹¹Hakuna chete anoyeuka zvinhu zvakare. Hakunawo achazoyeuka panevachauya mushure macho. Uye kuyeuka pachange pasina pakati pane vachauya mushure machowo.

¹²Ini Muparidzi ndakatonga Isiraeri ndiri muJerusaremu.

¹³Ndakazvipira kunyatsotsvaga nokuongorora noungwaru zvose zvinoitika pasi pedenga. Aiwaiwa! Mutoro wacho wakapiwa vanhu naMwari kuti vatakure haufadzi.

¹⁴Ndakatarisa mabasa ose anoitwa pasi pezuva ndikaona zvangu kuti zvose hazvinzwisisiki uye kuti kunongova kudzingirirana nemhepo zvako.

¹⁵Chakakombama hachitasanudziki chisipo hachigone kuverengwa.

¹⁶Ndakambozvifunga zvangu mumwoyo ndichiti, “Ini ndakawana ungwaru hunokunda vamwe vose vakanditangira kuva vatongi veJerusaremu. Zvakanyatsondipindawo mumwoyo kuti chinonzi ungwaru chii uye kuti chinonzi ruzivo chii.”

¹⁷Ndakazvipira kwazvo kuti ndizive kuti chinonzi ungwaru chii uyewo kuti chinonzi upenzi chii. Ndakaonawo ikoku kuri kungodzingirirana zvako nemhepo.

¹⁸Chandinodariro ndechokuti ungwaru hukawanda nhamowo dzinobva dzaita murwi kuwanda. Anozviwanzira ruzivo anozviwanzirawo matambudziko.