Read Bhaibhiri Idzva rechiShona Muparidzi 10 Bible Online

Muparidzi 10 - Bhaibhiri Idzva rechiShona bible

Muparidzi 10

¹Nhunzi dzakafa dzinogona kunhuwisa mafuta anonhuhwira, saizvozvo utununu hunogona kukanganisa ungwaru nokuremekedzwa.

²Pfungwa dzomungwaru dzakarerekerera kurudyi pfungwa dzebenzi dzakarerekera kuruboshe.

³Nyange richifamba munzira benzi harina njere rinotaura kumunhu wose kuti ibenzi.

⁴Kana mutongi wako akakuvirukira nehasha, usabve pabasa rako nokuti kuzvibata kwako kunoita kuti mhosva huru iregererwe.

⁵Pane chimwe chinhu chakaipa chandakaona pasi pedenga kuri kukanganisa kwavatongi.

⁶Mapenzi anoiswa pamabasa makuru asi vapfumi vachigara panzvimbo dzapasi

⁷ndakaona varanda vari pamabhiza machinda achifamba pasi netsoka savaranda.

⁸Munhu anochera hunza achiwira mairi, anoputsa madziro anorumwa nenyoka.

⁹Anokwakwanura mabwe anokuvadzwa nawo anotsemurawo huni anogona kukuvadzwa nadzo.

¹⁰Kana demo rakagomara pamusana pokuti harina kurodzwa, kurishandisa unofanira kutoita nesimba rakawanda. Pakadai ungwaru ndihwo hunoita kuti munhu abudirire.

¹¹Nyoka ikaruma munhu isati yaitwa mapipi pairi, anoita mapipi wacho hapana chaanowana.

¹²Mazwi emungwaru anoita kuti adiwe navanhu asi muromo webenzi unoriparadzisa.

¹³Anotanga nokutaura zvisina maturo ozopedzisira nokupenga kwakaipa.

¹⁴Benzi rinotaura zvakawanda asi hapana munhu angazive zviri mune ramangwana. Ndiani angazivise munhu zvichazoitika mushure make?

¹⁵Benzi rinoshanda zvokufa zvokuti kunyange nzira yokuguta hariizivi.

¹⁶Inenhamo nyika inamambo achiri jaya zvaro uye inemachinda ayo anodyiririra mangwanani.

¹⁷Yakakomborerwa zvayo nyika inamambo akaberekwa kumbahuru uye inamachinda anodya nenguva kwayo vanodyira kusimba kwete kuraradza.

¹⁸Pamusana penungo denga remba rinowira mukati pamusana pokugara maoko imba inodonha.

¹⁹Chokudya chinoita kuti vanhu vafare waini inoita kuti upenyu hunakidze mari ndiye mupedzanhamo.

²⁰Usatsoropodze mambo kunyange nechomumwoyo usashurikidze rushambwa vapfumi kunyange mumba mako mokurara nokuti shiri ingadaro ikatakura mazwi ako zvimwe chipembenene chingadaro chikandotaura zvinhu zvacho.